‘Durugista misukol’ sa NBI, nasamdan

Mokabat sa P4 milyunes nga kantidad sa gituohang shabu ug tulo ka tag-as nga kalibre sa armas ang nasakmit gikan sa usa ka giingong drug lord ug sa iyang sinaligan atol sa ronda sa mga operatiba sa National Bureau of Investigation (NBI) Central Visayas.

Ang operasyon gihimo sulod sa pinuy-anan sa mga suspek nga gikataho’ng nahimo nilang drug den sa Barangay Calambua, lungsod sa San Remigio, amihanan sa lalawigan sa Sugbo sa Miyerkules sa hapon, Enero 24, 2024.

Ang mga suspek mao sila si Leo Montealto, 45, ug ang iyang katabang nga si Richel “Sadam” Banga-Banga, 33.

Sa press conference sa Huwebes, Enero 25, si Arnel Pura, NBI Cebu District Office (Cebdo) Agent-in-Charge, niingon nga gawas sa drugas, gipasanginlan usab ang duha og tulis, gun for hire, ug bag-o lang sa pagpanghasi sa pipila ka mga kandidato sa ilang barangay atol sa miaging Barangay and Sangguniang Kabataan Elections (BSKE) sa Oktubre sa miaging tuig.

Gidetalye pa ni Pura nga ang duha bag-o lang nakagawas sa Bogo City Jail human sa 12 ka tuig nga pagserbisyo sa illegal possession of firearms ug illegal drugs niadtong 2011.

Si Pura niingon nga si Banga-banga unang gibuhian human ang iyang kaso gibasura sa korte, samtang si Montealto mi-plead nga sad-an sa mga akusasyon ug gibuhian niadtong Abril 11, 2023.

Apan matod niya usa sa ilang kasaligang tinubdan nitaho nga ningbalik dayon ang duha sa ilang ilegal nga kalihukan human nakagawas sa prisuhan hinungdan nga gipaubos sila og surveillance sa NBI sulod sa usa ka buwan hangtod nga gisilbihan sila og warrant of arrest.

MISUKOL

Matod ni Bienvenido Panican, senior investigator sa NBI-Cebdo, ang duha ningsuway sa pagsukol sa ilang pagdakop ug misuway sa pag-eskapo apan sa kadugayan nitahan dihang si Banga-Banga nakaangkon og samad sa iyang tiyan.

Narekober gikan sa mga suspek ang 10 ka dagkong putos sa gituohang shabu nga motimbang og 500 gramos nga gibana-banang mobalor og P4 milyunes, cellular phones, ug uban pang drug paraphernalia, lakip na ang logbook nga adunay listahan sa mga ngalan, nga gidudahan sa NBI nga mga kliyente sa mga suspek.

Nasakmit usab gikan kang Montealto ug Banga-banga ang duha ka chamber-loaded caliber .45 pistol, usa ka shotgun, ug mga bala sa duha ka nahisgutang mga armas.

Gawas sa duha, laing napulo ka mga personalidad, nga gidudahan sa NBI nga ilang mga kliyente nasikop ug gipaubos sa drug test.

Duha sa mga nagpositibo gitanggong alang sa dugang nga interogasyon, samtang ang walo nga nagnegatibo gibuhian pagkahuman.

Si Panican niingon nga sa duha, hayan si Montealto posibleng anaa sa luyo sa dakong drug network sa pagpadaghan sa ilegal nga drugas sulod sa northern Cebu.

Ang duha gikataho’ng maka-dispose og kapin sa usa ka kilo sa ilegal nga drugas matag buwan nga gikan sa Talisay City.

Si Pura niingon nga ilang susihon ang pipila ka kaanib partikular na sa usa ka politiko sa northern Cebu.