‘Baha sa ting-init’

Medyo dili haom kon maghisgot bahin sa baha ning panahuna nga gideklarar na sa Pagasa weather bureau ang pagsulod sa El Niño phenomenon ug nagsingabot usab ang summer season.

Apan nasayod ka ba nga panahon sa ting-init mas maayo ang pagpatuman sa proyekto sa drainage o pagpalambo sa waterways? Siyempre dili babag ang baha sa trabaho. Sa pag-abot sa ting-uwan, andam na kini. Sa inyong obserbasyon, may tino ba nga proyekto nga gituman karon? Way klaro.

Naaghat usab ang atong paghisgot niini tungod sa sugyot sa Cebu City District Engineering Office (CCDEO) sa Department of Public Works and Highways (DPWH) ngadto sa Cebu City Government alang sa pagpatuman sa mga proyekto nga mopalambo sa mga sapa ug suba nga mogasto og P8.2 bilyunes.

Nahinabi sa media human sa usa ka executive session sa City Hall sa Miyerkules, Enero 24, 2024, si Earl Carlo Escanuela sa Unified Project Management Office-Flood Control Management Cluster (UPMO-FCMC).

Gibutyag ni Escanuela nga ang P8.2 bilyunes maoy kinatibuk-ang pundo sa mga proyekto sa nagkalainlaing kasapaan ug suba nga kanunay mosuyla sa pagbunok sa uwan ug hinungdan dayon sa pagbaha o lunop labina sa ubos nga bahin sa dakbayan.

Gitumbok niya ang mga suba sa Bulacao, Guadalupe, Hipodromo, Kinalumsan, Lahug, Linao, Parian, Subangdaku, ug Tejero.

Unsay detalye sa proyekto? Wala pa gibutyag. Planohan pa kaha? Apan ang tataw mao ang P8.2 bilyunes nga budget nga ilang gisugyot. Apan si Cebu City Councilor Jerry Guardo, chairman sa committee on infrastructure ug apil sa naasoy nga sisyon, nihatag og kinatibuk-an nga ideya sa mga sakop sa media.

Matod ni Guardo, ang mga proyekto mao ang pagpalapad ug pagpalawom o pagkawot sa mga suba ug kasapaan, paglihis o divert sa tubig, ug ubang civil works.

Samtang, si Escanuela nagkanayon nga duna nay nagpadayong pagpatuman sa mga proyekto nga naglakip sa ‘pagpalambo’ sa mga suba sa Lahug, Guadalupe, Kinalumsan, ug Bulacao.

Kon atong kwentahon, segurado nga subra pa sa P8.2 bilyunes na ang nagasto sa mga ‘pat-ak pat-ak’ nga proyekto sukad pa niadto, apan napamatud-an nga way ayo. Nangalimyon lang hinuon ang pagduda sa kurapsyon sa proyekto.

Tinuod problema gyud ang pagkadaut sa waterways. Way tino nga drainage system. Kinahanglan masolusyonan na.

Bahin sa sugyot nga P8.2 bilyunes nga pundo, ang katawhan dili seguro moalma basta klaro ang direksiyon nga gastuhan sa salapi.

Labaw na kon makita ang paspas nga pagtrabaho sa panahon sa ting-init.