AI sulbad ba sa problema sa trapiko?

Gusto ni Cebu City Mayor Michael Rama nga mobutang og traffic system nga artificial intelligence (AI) driven kun padaganon pinaagi ning mao nga teknolohiya. Unsa kaha diay ning gipangtaud nga traffic lights sa dagkong intersection sa dakbayan, di diay ni AI?

Mao ni ang gipasigarbo sa administrasyon ni anhing mayor Edgardo Labella dihang giinagurahan ang unang intersection sa P. del Rosario ug Pelaez Sts. nga gimuntaran ning giingon nga AI traffic lights nga dunay sensors.

Ang mao nga traffic lights gipaila ug gipasigarbo nga dunay sensor ug camera nga makatabang sa pag-monitor sa dagan sa traffic ug makatabang sa AI sa pag-calculate kon asa nga portion sa karsada nga palabangon ang mga sakyanan.

Apan ingon sa wa kini makasulbad sa kahuot sa trapiko sa kadalanan nga gibutangan niini, kana kon pasultihon ang pipila ka mga opisyal sa Siyudad sa Sugbo nga ingon sa wa nakauyon ug natagbaw sa performance niini sa unang 18 ka major intersections sa siyudad.

Apan sa gihulagway ni Rama nga traffic system, sama sa naghisgot siya sa teknolohiya sa traffic system nga gipasigarbo sa kanhi administrasyon nga iyang gipulihan.

Nakagasto na baya ang Siyudad og kapin sa P200 milyunes sa unang phase. Duna pay nagpadayon, kana kon wa nila gipahunong, nga pagpanaud sa giingong AI traffic system. Gipahunong na ba nila ni Rama nga naghisgut na man sila og AI nga traffic system?

Kay pundo man nga publiko ang gigamit, nganong di man mosulti ang Dakbayan sa status sa traffic system, gihunong ba ug malampuson ba ang katuyoan niini nga mao ang pagsulbad sa kahuot sa mga sakyanan sa kadalanan?

Di kay maghisgut na sab ang mayor og AI-assisted traffic system nga way pagbutyag sa epekto sa samang sistema nga gipasigarbo sa miaging administrasyon. Tinuod ba nga AI kini? Unsa may evaluation sa Cebu City Transportation Office (CCTO) ug sa traffic board, epektibo ba kini?

Pasabta ninyo ang lungsod.