70-anyos nga Pinay giila nga patay sa Maui fire
HONOLULU, Hawaii— Ang katapusan sa 100 ka nailhang mga biktima sa sunog nga miguba sa makasaysayanong lungsod sa Maui sa Lahaina niadtong Agusto giila niadtong Biyernes nga usa ka 70-anyos nga babaye kansang bana, igsuong babaye ug ubay-ubay pang mga paryente, nangamatay usab sa sunog.
Ang kapulisan sa Maui niingon nga ilang giila ang biktima nga si Lydia Coloma base sa konteksto diin nakit-an ang mga lawas, inay pinaagi sa DNA o uban pang positibong pamaagi sa pag-ila.
Ang iyang bana, kauban ang usa ka igsuon, bayaw, pag-umangkon nga babaye ug pag-umangkon nga lalaki, nangamatay usab sa sunog, matod sa iyang bayaw nga si Tina Acosta, sa Honolulu.
Si Coloma gikan sa probinsya sa Ilocos Sur sa Pilipinas, matod ni Acosta, ug nidugang nga wala siya masayod kon nganong nadugay ang final identification.
“We were waiting,” matod niya. Ang pag-ila sa mga nangamatay sa labing makamatay nga sunog sa U.S. sa kapin sa usa ka siglo usa ka taas, lisod nga proseso.
Ang mga eksperto sa forensic ug mga iro nga motultol sa mga lawas kinahanglan nga mokuykoy sa abo sa pagpangita sa mga lawas nga posibleng nangasunog ug ang mga otoridad nangolekta og mga sample sa DNA gikan sa mga sakop sa pamilya sa mga biktima.
Ang DNA testing nagtugot sa mga opisyal niadtong Septiyembre sa pag-usab sa gidaghanon sa nangamatay paubos, gikan sa 115 ngadto sa labing menos 97.
Ang gidaghanon miusbaw og gamay sa sunod nga bulan tungod kay ang pipila ka mga biktima nangamatay sa ilang mga paso o samtang ang mga polis nakakaplag og dugang mga lawas.
Ang ihap sa mga nagpabilin nga missing niminos usabnga pipila na lang gikan sa 400, sumala sa Maui Police Department.
Si Coloma naa sa listahan sa wala mailhi sa wala pa ang iyang opisyal nga pag-ila isip biktima. Tulo ka tawo ang nagpabilin sa listahan.
Ang mga biktima nag-edad gikan sa 7 ngadto sa 97, apan sobra sa 2/3 anaa sa edad nga 60 o labaw pa, sumala sa listahan sa Maui police sa mga nailhang biktima.
Kadaghanan mga residente sa usa ka low-income nga senior apartment complex.