Toothpick makaon?

Nipadasidaan karon ang mga health official sa South Korea sa publiko human nag-trending sa maong nasod ang pagprito sa mga toothpick susama og makaon, sigun sa taho sa Reuters.

“This is not a product to eat. Their safety has not been verified,” sigun sa ilang Ministry of Food and Drug Safety sa post niini sa X (kanhi Twitter).

Nagpasad ang mga video niini sa kontrobersyal nga trend online: sa mga video makita ang toothpick nga giprito sa init nga mantika nga modako susama sa kropik.

Daghang mga video niini ang gi- upload sa Tiktok, Instagram ug Youtube. Gani, usa ka youtube creator nga si @toozidiary nihulagway sa lami niini nga susama sa “rice cakes.”

Base sa taho sa New York Post nga ang binuhatan sa pagkaon sa toothpick posibleng usa ka sintoma sa “pica” nga usa ka kondisyon sa pagkaon sa di makaon nga mga butang.

Nasuta nga sagad sa mga toothpick sa South Korea ginama sa harina sa mais o patatas nga gisagulan og sorbitol, usa ka matang sa tam-ison nga alcohol nga nagsilbing laxative sa dakong konsentrasyon.

Pasabot niini nga ang toothpick sa maong nasod medyo tam-ison ug ginama sa ‘ecofriendly components’ nga malata ug dali ra matunaw sa tubig.

Ang green nga kolor niini, naggikan sa food coloring nga sagad gigamit sa mga finger food sa mga restaurant sa nasod.

Bisan pa sa pagka “environment friendly” sa mga toothpick, niabiso ang health department sa nasod batok sa pagkaon niini sanglit wa pa kini nila naaprobahan nga makaon.

Ang mga crispy toothpick mao sab ang nisikat karon sa mukbang videos sa internet. /

■ SUSAMA’S KROPIK: Trending karon sa South Korea ang pagprito sa ilang mga toothpick ug pagkaon sanglit kini kagumkom. Apan ang ilang health department nipasidaan batok sa pagkaon niini sanglit wa kini nila aprobahi nga luwas kan-on sa tawo.