Lalake ni-take sa exam sa uyab?

Astang gugmaha. Arestado kining usa ka 26 anyos nga lalake didto India human nga nagpakaaron ingon nga iyang uyab ug ni-take pa kini sa eksaminasyon niini.

Nailhan ang suspetsado nga nagsinina pa og pambabaye nga si Angrez Singh kinsa ang hulagway nag-viral online.

“He tried to enter the examination hall by changing his appearance,” sumala sa tigpamaba sa kapulisan nga si Manoj Kumar base sa taho gikan sa Jam Press.

Usa diay ka recruitment test ang gi-take ni Singh alang sa iyang uyab nga si Paramjit Kaur, 34 anyos, sa DAV Public School sa Kotkapura Punjab sayo ning buwana, sigun sa taho sa Indian Express.

Nasuta sa The New York Post nga nahagbong si Kaur sa eksaminasyon kaniadto. Kinahanglan siya nga mopasar niini sanglit buot siya mahimong healthcare worker.

Aron mailad ang mga opisyal nga nihimo sa eksam, gi-shave niini iyang bungot, nag-make-up ug nagsul-ob og pambabaye nga sinina usa nisulod sa exam room.

Iya sab gisundog ang voter’s ID ug mga importanteng dokumento sa iyang uyab sama sa Aadhaar card aron lang makaingon ang mga opisyal nga siya mao iyang uyab.

Apan pakyas si Singh ug nahagbong sab siya sa eksam.

Didto na gidudahan sa mga opisyal si Singh sa dihang ang hulagway niini sa application form wa nagtugma sa nawong ni Kaur, sigun ni Faridkot Police Superintendent Harjeet Singh.

Paambit pa ni Kumar nga ilang gipaubos og biometrics si Singh ug didto na nasuta nga wa kini matugma sa record sa awtoridad.

Tungod niini, giaresto si Singh sa awtoridad samtang gipasanginlang nakigkonsabo si Kaur sa iyang uyab.

Nagpatungpatong ang kaso nga giatubang sa duha sanglit giimbestigahan man sab sa kapulisan kon giunsa ni Singh pagpameke sa mga dokumento.

“A man can take such a risk only for his girlfriend,” sumala sa police officer. /

■ TUNGOD SA GUGMA: Usa ka lalake ang nagpakababaye aron maka-take sa exam sa iyang uyab didto sa India. Bisan pa man niini, napakyas siya sa iyang tinguha human masakpi sa awtoridad. Hagbong sab siya sa exam.