Salog sa balay nahunlak; 2 angol

Sementado’ng salog sa sala sa usa ka balay sa Sitio Anapog, Barangay Lahug, dakbayan sa Sugbo nahunlak ug niangol sa duha ka mga babaye pasado alas 11:00 sa buntag sa Lunes, Enero 29, 2024.

Ang duha nakaangkon og gamay nga mga samad sa tiil.

Dali nga niresponde ang mga sakop sa Cebu City Disaster Risk Reduction and Management Office (CCDRRMO) aron ma-assess ang kadaut sa balay nga gipanag-iya nilang Ana ug Jerusalem Edillon.

Matod ni Jerusalem, samtang nananaw sila og salida sa telebisyon ang iyang anak lalaki uban sa hinigugma niini diha sa ilang sala, kalit nga nahugno ang salog dungan sa pagkatagak sa anak niining babaye nga nagpangidaron og 20 lakip na ang 17 anyos nga dalaga nga hinigugma sa iyang anak.

Ang pagkabuho dunay giladmon nga dili momionos sa lima ka tiil.

Maayo na lang nga wala mataboni ang mga biktima ug nahaw-as dayon sa mga silingan.

Si Ana Edillon nga nahinabi sa Superbalita Cebu nagkanayon nga niadtong 2022, nabantayan na nila nga na hallow ang ilawom sa salog sa ilang sala tungod kay mouyog na kini kon tamakan, lakip na ang ilang luyo nga agi-anan sa mga tawo.

Nagsugod ang pagka-hallow sa yuta human natapos ang usa ka commercial building nga naa sa ilang kilid nga usa sa ilang gidudahan nga maoy nakaingon nga milihok ang yuta.

“Sukad pag tukod ana nila diha, Sir, nabantayan namo, inig tunob hallow na gyud sa ilawom hasta padung sa luyo namo. Didto mi nakabantay first gyud didto sa luyo gani amo nanang gitapakan ang dalan sad,” matod ni Ana.

Kasamtangan lang una nga giabandunar ang portion sa sala sa panimalay sa pamilyang Edillon aron subayon kon dili na ba luwas nga puy-an.

Samtang, ang CCDRRMO ug mga hingtungdang ahensiya sa kagamhanan gikataka nga mosusi sa nahitabong pagkahunlak sa maong yuta.