BEERMEN MIABANTI SA FINALS
Giusban paghubog sa San Miguel Beermen ang Brgy. Ginebra Gin Kings, 94-91, sa Game 3 aron haruson pagdaug ang ilang best-offive semi-finals series, 3-0, sa Philippine Basketball Association (PBA) Season 48 Commissioner’s Cup niadtong Dominggo sa gabii, Enero 28, 2024, sa Mall of Asia Arena sa Pasay City.
Mao kini ang labing unang higayon nga nabutlog ang Gin Kings sa usa ka series gikan
niadtong 2015-16 Commissioner’s Cup batok sa Rain or Shine Elasto Painters.
Sa kadaugan, naangkon sa Beermen ang labing unang lingkuranan sa finals diin huwaton nila ang modaug sa laing semi-finals series diin kasamtangang nag-una ang Magnolia Chicken Timplados Hotshots batok sa Phoenix Super LPG Fuel Masters, 2-1.
Kuyaw na sab nga nakaduwa ang import sa Beermen nga si Bennie Boatwright hilabi na sa 3rd quarter aron pangulohan ang Beermen sa pagtangtang sa korona sa defending champions Gin Kings.
Si Boatwright nipakatap og 26 puntos ug 13 ka rebounds. Nakapasulod siya og duha ka three-point shots sa usa ka 8-0 run nga naghatag sa Beermen og 64-61 nga labaw nga wala na nila buhii hangtod na sa katapusang gutlo.
Nidugang og 17 puntos si Jericho Cruz alang sa Beermen samtang niamot og 14 puntos si Marcio Lassiter.
Ang Gin Kings gipangulohan sa ilang import nga si Tony Bishop pinaagi sa iyang 25 puntos, nitampo og 17 puntos si Scottie Thompson samtang nitunol og 12 puntos si Japeth Aguilar.
Puntos matag usa: San Miguel (94) – Boatwright 26, Cruz 17, Lassiter 14, Fajardo 11, Perez 11, Trollano 6, Teng 6, Ross 30. Ginebra (91) – Bishop 25, Thompson 17, Aguilar 12, Malonzo 10, Standhardinger 10, Tenorio 8, Pringle 5, Ahanmisi 2, Pinto 2. Quarters: 2118; 43-42; 75-69; 94-91.