Nagbinastos gipasaylo

Gipahibawo sa hepe sa Naga City Police Station, Police Lieutenant Colonel William Homoc, nga ila nang gipabuhian ang lalaking nagduwa-duwa sa iyang kinatawo ug gipakita ngadto sa mga babaye nga menor de edad.

Usa ka 39 anyos nga construction worker nga taga Barangay Sambagon, Lungod sa Pinamungajan, Sugbo ang gidakop niadtong Dominggo, Enero 28, 2024 sa Purok Seaside Tapon, Barangay Tinaan, Dakbayan sa Naga.

Identity sa maong suspek gipugngan ning pamantalaan human wa idayon ang kaso batok kaniya.

Gikataho nga ang suspek nagbarog atubangan sa usa ka balay ug nagduwa-duwa sa iyang kinatawo. Adunay duha ka mga menor de edad nga nakakita.

Ang mga biktima nagpangidaron og 12 ug 17 anyos hinungdan nga ang inahan sa usa sa mga biktima nangayo og police assistance.

Nagkanayon si Homoc nga niadtong Lunes, Enero 29 gibuhian si Baluro ug wa na mobalik ang mga reklamante sa police station kay gipasaylo na nila ang suspek.

Nasayran nga hubog niadtong higayuna ang suspek gikan nagtagay sa iyang gibisita nga paryente.

Ang mga biktima nakurat sa dihang giugay ugay sa suspek ang iyang kinatawo nga nagpangamay ngadto sa mga biktima.

“Ang mga bata nga nakakita nanagan, mitug-an sa ginikanan.

Apan dili mapugos sa polis ang mga reklamante kon moatras sila sa pagpasaka og kasong ‘Anti-Bastos Law’ batok ni Baluro.

Ang pagpakita sa kinatawo gitawag sa psychology og exhibitionism, usa ka sakit sa panghuna-huna.

Leksyon sa kadtong uban nga maghuboghubog naa tay balaod aning magbinastos, atong gisikop.” - Police Lieutenant Colonel William Homoc