Kumusta ang night market?

Ang Colon night market nga niokupar sa usa ka bahin sa dalan Colon ug Junquera, dakbayan sa Sugbo, motapos na karon, Miyerkules, Enero 31, 2024.

Nagsugod kini niadtong Oktubre 2023 sa Enero 31, 2024 human gilugwayan kini tungod sa Sinulog.

Unsay imong kasinatian sa night market? Kumusta ang presyo sa mga baligya ug pagkaon? Unsa ang kalidad niini?

Importante ang atong reaksiyon alang sa pagpalambo sa inisyatiba o kaha basihan aron dili na mopahigayon niini sa umaabot.

Ang klaro nga kasinatian, nakapahuot o nakapausab kini sa dagan sa trapiko labina sa usa ka bahin sa dalan Colon.

Nahimong one way sugod sa alas 6:00 gabii ngadto sa alas 12:00 sa gabii.

Gawas pa, nakigkompetensiya kini sa negosyo sa mga tindahan o malls sa Colon nga sagad manira pa sa alas 9:00 sa gabii.

Samtang, maayo kini nga kahigayunan sa mga vendor o ubang ginagmay nga negosyante nga dunay temporaryong dapit nga makapaninda alang sa dugang kita.

Si Maria Pino, night market organizer ug chairperson sa Cebu City United Vendors Association (CCUVA), nga nahinabi sa SunStar Cebu niadtong Dominggo, Enero 28, 2024, nagkanayon nga kapin sa P2 milyunes ang ilang natampo nga kita sa Dakbayan.

Gihulagway ni Pino nga malampuson, malinawon ug han-ay ang dagan sa night market.

Laing isyo ang nitumaw nga unang gibutyag ni Konsehal Jocelyn Pesquera, ngano nga ang CCUVA nga usa ka pribado nga grupo maoy nagdumala sa night market.

Maayong matubag kini kon dunay laing night market sa dakbayan sa Sugbo ug ipahigayon subay sa pagkoriher sa dili maayong kasinatian.

Mas maayo nga mapahiluna kini sa dili sentro nga mga dalan aron di kaayo dako ang isyo sa dagan sa trapiko.

Nindot nga inisyatiba ang night market sa pagtabang sa mga gamay nga negosyante, apan dili usab maayo nga makaapekto kini sa lihok sa kinatibuk-an publiko.