Proposal gipaagi og tulis
Daghang panahon ug paningkamot ang gigahin sa pagplano sa hingpit nga proposal kon ang usa ka lalaki nakahukom sa pagluhod aron pangayuon ang kamot sa iyang hinigugma sa kaminyuon.
Hinuon, karong mga panahuna, ang mga tawo nagsalikway sa kinaraan nga mga pamaagi ug nagmugna og talagsaon nga mga ideya sa ilang pagpangutana sa babaye.
Sa usa ka talagsaon nga proposal, usa ka tawo sa Colombia nakahukom nga mangutana siya sa iyang partner apan gipaagi sa armadong pagpanulis, nga usa ra diay ka prank.
Usa ka video sa insidente nga nag-viral sa Instagram nagpakita sa usa ka lalaki nga nag-propose sa iyang uyab sa tunga-tunga sa karsada human sa gipahigayon nga peke nga pagpanulis.
Ang video nagsugod sa pagpakita sa usa ka pula nga awto nga nagpadulong sa usa ka intersection sa dihang kalit lang, usa ka pedestrian ug duha ka mga lalaki nga nagsakay sa motorsiklo ningbabag sa agianan niini.
Gihangyo nila ang manag-uyab nga naglingkod sa sulod sa awto nga mogawas, samtang ang usa sa mga lalaki nagpunting sa hitsura sa usa ka gitago nga pistola ngadto sa babaye. Gipugos sa duha ka sakop sa gang ang lalaki sa pagluhod samtang gigunitan ang babaye sa iyang atubangan.
Unya, sa usa ka wild nga plano, ang mga lalaki mihunong sa pagsinggit ug ang nagluhod nga lalaki nikuha og singsing aron i-propose ang iyang uyab, taliwala sa mga pakpak sa mga tawo.
Human makaamgo nga kini usa ka prank, ang babaye nisagpa og balik-balik sa lalaki, samtang iyang gipasulod ang singsing sa tudlo sa girlfriend. Ang manag-uyab naggakos ug naghawok, nagsaulog sa ilang engagement samtang ang iyang mga kauban nag-abiba kanila.