Kampanya batok sa kriminalidad mas pahugtan sa CPPO ning tuiga
Hingusgan pa sa Cebu Police Provincial Office (CCPO) ang ilang kampanya batok kriminalidad karong tuiga nga una nilang gisugdan atol sa pag lingkod sa ilang hepe nga si Police Colonel Percival Zorilla.
Matod ni Police Major Windel Abellana, information officer sa CCPO, nga ilang palambuon ang ilang kampanya batok sa ilegal nga drugas, illegal gambling, pag gukod sa wanted persons ug pag imbargo sa loose firearms.
Tinguha nila nga makuhaan ang problema sa ilegal nga drugas sa matag lungsod sa lalawigan sa Sugbo lakip na kadtong dunay mga pending nga kaso sa korte nga padayon nga gipangita sa balaod.
Gipasigarbo ni Abellana ang resulta sa ilang anti-criminality campaign gikan sa Enero 22 ngadto sa Enero 28, 2024 diin nakasikop sila og 63 ka mga drug personality atol sa ilang 47 ka anti-illegal drug operations nga niresulta sa pagkasakmit sa 441.26 gramos sa gituohang shabu nga dunay standard drug price nga P3.5 milyunes.
Sa wanted persons, sila nakalusad og 24 ka operations nga niresulta sa pagkasikop sa 28 ka mga tawo nga dunay mga
warrant of arrest, lakip na niini ang pagsakmit sa 31 ka mga armas nga walay lisensya gikan sa siyam ka mga suspek nga napasakaan na’g kaso sa korte.
REVAMP
Subay sa pagpalambo sa ilang kampanya batok sa krimen,gipanglahugay ang mga hepe sa lima ka mga police station sa probinsya sa Sugbo human nga ang uban kanila angay na nga hulipan sa katungdanan.
Ang mga police station nga apektado sa lahugay mao ang Bantayan police station, Pilar Municipal police station, Alegria Municipal Police station, Borbon Municipal police station ug Poro Municipal police station.
Sugod sa Enero 31, 2024, ang hepe sa Bantayan police station mao na si Police Lieutenant Colonel Leo Ty human hulipi sa katungdanan si Police Lieutenant Colonel Julius Garcia.
Si Police Captain Crisanto Arreglo mao na karon ang hepe sa Pilar police station hulip kang Police Captain Michael Echavez nga mao na usab karon ang hepe sa Alegria hulip kang Police Police Captain Alexius Tangub.
Ang bag-ong hepe sa Borbon police station mao na usab si Police Captain Gerry Antopina hulip kang Police Captain Roel Tanza samtang si Police Captain Marlon Adao mao ang gitudlo nga mangulo sa Poro police station hulip kang Police Captain Renerio Mejias.
Ang assumption of office gidumala ni Police Colonel Percival Zorilla, hepe sa kapulisan sa lalawigan sa Sugbo.
Mando niini sa bag-ong mga hepe nga ipatuman ang mga programa sa PNP lakip na ang iyang mga mando pagpuhag sa kriminalidad sa ilang hurisdiksyon.