Kinsay moatiman

Dear Noy Kulas,

Maayong adlaw nimo ug sa imong readers. Ang akong problema parte ni namong magsuon ug sa among inahan nga tiguwang na.

Sa namo nga magsuon, ako ang close sa akong parents. Sukad sa pagkamatay ni Papa, ako na ang gaatiman ni Mama. Apan naminyo na ko ug duna nay duha ka mga anak. Ang akong mga igsuon nagsalig lang gihapon nga ako ang makaatiman sa among inahan nga unta di man ako ray anak. Bisan sa pagpalit og supplies para ni Mama, ako lang gihapon.

Upat mi ka magsuon nga naa ra tanan dinhi sa Pilipinas. Ako nang giingnan ang akong mga igsuon pero wa gyud sila manumbaling sa akong hangyo nila. Kay ako kuno ang favorite ni Mama which is bisan tinuod, di man kay ako ra ang anak. Naa na sab koy pamilya nga atimanon.

Unsa may akong buhaton aron mapugos ni sila pag assist nako kay hapit na maupos ang akong pasensya? Mapugos ba nako sila sa pag-atiman kang mama? Ngano kaha nga ing ani man sila nga unta pinangga man ming tanan sa among parents? Daghang salamat sa imong tambag.

THET

Thet,

Problema ni nga common sa mga magsuon nga mag-ampahay na kinsay moatiman sa mga ginikanan kon matiguwang na. Daghan ang mga pamilya nga naa ani nga suliran. Ang uban mas grabe kay mag-ilog sa katigayunan ug mas grabe kay buhi pa ang parents, ilugan na ang mga kabtangan.

Ingna ang imong mama nga magpatawag siya og meeting ninyong mga magsuon. Kanang naa ang inyong inahan, siya na mismo ang mohangyo sa imong mga igsuon nga motabang sa pag-atiman kaniya. Kay mas maminaw tingali na sila kay nimo.

Kon di man ang inyong inahan, kon naa kay uyoan o iyaan nga gitahod nila, mao ni ang hangyoa nga makigsulti nila. Sabutan ninyo ang ilang papel sa pag-atiman sa inyong inahan kay di lang ikaw ang anak. Ubos usab sa balaod, di lang ikaw ang naay responsibilidad, sila usab. Apan di na man na makareklamo ang inyong inahan ngadto sa korte, mao nang kamo lang ang pamilya mag-estorya. Pangusgi aron mapugos na sila.