Pati nalaan nga espiya
New Delhi - Gipalingkawas sa mga polis sa India ang usa ka gidudahang Chinese spy pigeon (pati) human sa walo ka bulan nga pagkabilanggo ug gibuhian sa gawas niadtong Martes, matod sa news agency Press Trust sa India.
Nagsugod ang kalbaryo sa pati niadtong Mayo 2023 dihang nadakpan kini duol sa usa ka pantalan sa Mumbai nga dunay gihigot nga duha ka mga singsing sa mga bitiis niini, nga dunay mga pulong nga morag Chinese.
Gisuspetsahan sa mga polis nga nalambigit kini sa pagpangespiya ug gikuha kini, sa ulahi gipadala kini sa Bai Sakarbai Dinshaw Petit Hospital for Animals sa Mumbai.
Sa kadugayan, nasayran nga ang pati diay usa ka open-water racing bird gikan sa Taiwan nga naka-eskapo ug naabot sa India.
Uban sa pagtugot sa kapulisan, ang langgam gibalhin ngadto sa Bombay Society for the Prevention of Cruelty to Animals, kansang mga doktor nipalingkawas niini niadtong Martes.
Ang kapulisan sa Mumbai wa makuhai sa iyang pamahayag.
Dili kini ang unang higayon nga adunay usa ka langgam nga gisuspetsahan sa kapulisan sa India.
Kaniadtong 2020, gipagawas sa mga polis sa Kashmir nga kontrolado sa India ang usa ka pati nga iya sa usa ka mananagat sa Pakistan pagkahuman nakit-an sa usa ka pagsusi nga ang langgam, nga milupad tabok sa lapad nga militarized nga utlanan tali sa mga nasod nga armado sa nukleyar, dili usa ka espiya.
Kaniadtong 2016, usa pa ka pati gidakop human kini nakit-an nga adunay usa ka note nga naghulga sa Punong Ministro sa India nga si Narendra Modi.
Ang India ug China dunay init kaayo nga kasungian tali sa ilang mga utlanan, diin duna nay pipila ka mga engkwentro nga dunay nangamatay.