Molampos kaha sila si Duterte?

Gilusad nila ni kanhi Presidente Rodrigo Duterte ug kanhi House Speaker ug karon Kong. Pantaleon Alvarez ang Mindanao initiative, usa ka lakang padulong sa pagbuwag sa Mindanao gikan sa Pilipinas.

Iyang gitataw nga di kini sedetion kay usa kini ka legal nga lakang nga gitugot sa international law. Matod sa kanhi Presidente nga ila kining gibuhi human nila makita nga sa nangagi nga mga administrasyon ug hangtod karon, napasagdan ang Mindanao.

Nakaamgo ba kaha siya nga usa man siya sa nangagi nga mga Presidente nga naglingkod sa unom ka mga tuig? Unsa diay ang iyang gibuhat sa unom ka mga tuig nga pangatungdanan? Di ba iya man nga gipasigarbo ang Mindanao Railway Project nga mapatuman sulod sa unom ka mga tuig nga pangatungdanan?

Ang China ang iyang gisangpit sa paghimo sa proyekto, apan nahuman na lang ang iyang termino, way bisan usa lang gani ka dapat sa reles ang nabutang kay kutob ra sa laway ang estorya sa China.

Ang Kagamhanan sa Estados Unidos nga iyang gisaway og maayo atol sa iyang administrasyon mao na ang nisaad sa paghimo sa proyekto ubos sa administrasyong Marcos. Kini mas duol pa sa tinuod kon basehan ang nangagi nga mga commitment sa Amerika nga gituman niini.

Kining mga lakang ni Duterte gihimo human ang kagamhanan karon niuyon nga mosulod sa nasod ang International Criminal Court (ICC) nga moimbestigar sa extra judicial killings panahon sa iyang administrasyon.

Molampos ba kaha ang kanhi Presidente ug mga kauban ning ilang inisyatiba nga bisan gani mismo ang kanhi mga rebeldeng Muslim niundang na niini ug nagsugod na sa pagpalambo sa ilang mga komunidad ubos sa pagabag sa kagamhanan?

Mosugot ba kaha ang minilyon ka mga Pinoy sa Mindanao nga mobuwag sa Pilipinas? Kon madayon ug molampos, mo-abroad na sila dinhi sa nasod kon mobisita sa ilang mga kabanay. Maglisodlisod lang gyud sila?