6 nang patay sa baha sa landslides sa Davao
Niabot na og unom ang ihap sa mga nangaangol tungod sa pagdahili sa yuta ug baha nga dala sa trough sa Low-Pressure Area (LPA) sa probinsya sa Davao de Oro samtang duha ka mga indibidwal ang missing.
Base sa report nga gihatag sa Provincial Local Government Unit sa Davao de Oro (PLGU-Davao de Oro) subay sa inisyal nga assessment sa Provincial Disaster Reduction Risk Management Council (PDRRMC) niadtong Biyernes sa buntag, Pebrero 2, 2024, duha ka patay’ng lawas ang narekober sa munisipyo sa
New Bataan, tulo sa Maragusan, ug usa sa Pantukan.
Sa New Bataan, ang mga biktima giila nga sila si Mimai Pagantupan, 76, kinsa giingong nalumos sa baha sa ilang pinuy-anan sa Barangay Cagan, Andap, ug Junjun Romagos kinsa gikataho’ng nalubong nga buhi sa dakong pagdahili sa yuta sa Barangay Camanlangan.
Samtang, gikumpirmar sa Municipal Disaster Risk Reduction Management Office sa Pantukan (MDRRMO-Pantukan) ug uban pang humanitarian rescue teams ang kamatayon ni Marcilla Bantasan gikan sa Barangay Magnaga.
Gipangita usab sa mga responder ang 74-anyos nga si Vicencio Mahinay kinsa na-missing human sa grabeng baha sa Barangay Araibo.
Sa laing bahin, tulo ka patayng lawas ang narekober sa Purok Buongon, Sitio Saranga, Barangay Poblacion, Maragusan niadtong Enero 31 sa buntag.
Giila sa mga otoridad ang mga biktima nga sila si Ananias Andoy, 56; Virginia Buhian, 59; ug Jerlyn Lada, 12. Gikataho nga mga residente sa maong dapit.
Hinuon, wala pa makuha sa MDRRMO-Maragusan ang lawas ni Felipe (walay apelyido nga gitumbok sa LGU) tungod kay nagpadayon pa ang search and rescue operation bisan pa man sa kusog nga ulan sa maong dapit.
“Gina-retrieve pa nila kay wala pa gyud balita nga nakit-an,” matod sa Provincial Information Officer sa Davao de Oro.
Sa pagsulat sa balita, ang Provincial Engineering Office (PEO) ubos sa pagdumala ni Davao de Oro Governor Dorothy Montejo-Gonzaga nipahigayon na og clearing operations sa pipila ka mga national highway ug barangay roads sa pipila ka mga lungsod.