3 ka polis patay sa engkwentro

Labing minos tulo ka mga polis ang nangamatay ug upat ang samdan atol sa engkwentro tali sa mga sakop sa pribadong armadong grupo sa Barangay Mahayag, Sta. Margarita, Samar niadtong Martes, Enero 30, 2024.

Sa impormasyon nga gipagawas sa Police Regional Office-Eastern Visayas (PRO 8) nasayran nga ang mga nangamatay giila nga sila si Staff Sergeant Christian Tallo, Corporal Eliazar Estrelles Jr., ug Master Sergeant Paul Terence Paclibar.

Ang nangasamdan nga mga polis nailhan nga sila si Corporal

Rannel Pedamato, Corporal Mark Jason Sixta, Patrolman Ham Kritnere Capalis, ug Patrolman Mark Redoblado.

Ang mga polis gikan sa 1st Samar Provincial Mobile Force Company ug Regional Mobile Force Battalion-8.

Didto sila sa Barangay Mahayag, nga mga 15 kilometros ang gilay-on gikan sa town proper, aron i-serve ang warrant of arrest sa mga giila nga gituohang sakop sa usa ka criminal group dihang nahitabo ang engkwentro mga alas 5 sa kaadlawon niadtong Martes.

Human sa insidente, nasikop usab sa hiniusang puwersa sa kapulisan ang upat ka wala mailhing mga lalaki ug nakuhaan usab og usa ka M-16 Armalite rifle, kalibre .45 nga pistola, ug daghang mga bala.

Ang nangasamdan nga mga polis gi-airlift sa Tactical Operations Group sa Philippine Air Force gikan sa Barangay Mahayag ug gidala sa duol nga tambalanan alang sa dinalian nga medikal nga pagtagad.

Ang napatay nga mga polis gidala sa St. Peter Funeral sa Calbayog City.

Gilusad sa mga otoridad ang hot-pursuit operation batok sa nahibiling mga sakop sa kriminal nga grupo.