Ang pagkatap sa mga liga sa Sugbo
Atong gihangop kining nag-trending karon nga mga liga sa basketball, ilabi na sa kabatan-unan, nga atong makita ug madungog sa bisan asa na nga dapit.
Dako kaayo ni og impact ug ikatabang sa paghashas sa tagsa-tagsa ka mga abilidad sa mga bata ug sa pagpalambo sa natad sa paugnat sa kusog sa tagsa-tagsa ka mga dapit sa Sugbo.
Gawas niini, mawahing usab ang ilang atensiyon gikan sa dautang bisyo ngadto na sa sports.
Mao nay giingon nga kini maoy usa sa mga pamaagi sa pagkombati batok sa gidiling drugas nga mora ra ba og nibalik pagkatap karon sa atong palibot.
Pero ato lang sab hangyuon ang mga organizer nga tumanon nila kon unsa may ilang gikasabutan ug ang tunhay nga pagpasunod sa mga lagda nga gipahaum niini.
Di man tuod nato kalikayan kining ginagmayng problema nga atong masugatan, pero at least flexible ta sa atong baruganan.
Buot ipasabot nga kon kini dili makabalda sa liga ug dili makaaapektar sa overall operation sa torneyo, mahimo natong sabot-sabot lang.
Ang importante nga maka-establish ta og camaraderie ug good relationship sa mga participants.
Ug labaw sa tanan, fair and square sa pagtratar sa tanang misalmot nga wa kay gidapigan.
Dili baya lalim ang panahon nga gigahin sa team, gasto ug ang kahago sa pagserbisyo ug pag-amoma sa mga bata.
Yes, atong gihangop kining pagsanay sa mga ingon aning kalihukan, pero subo palandungon nga nagkadaghan na usab ang mga reklamo batok sa pipila ka mga organizer.
Nasukwahi sa gipatuo sa mga nagpasiugda nga maoy nakapasagmuyo kanila.
So, ngadto sa mga organizers, basin og matagaman na hinuon ta ug mabati pa unya ang kridibilidad sa atong liga. Kinsa pa may masampit ninyo sa sunod og bati ang inyong pagdala.
Sa habig usab sa mga teams, pilia kanang mga organizer nga kasaligan ug adunay tinud-anay nga passion sa sports. Kanang ang pagpahanas gyud sa abilidad maoy hatagan og prayoridad kay kini maoy saktong giya sa kabatan-onan.
Bahalag di alegre basta hapsay. Okey na.
Kudos sa mga organizers.