Ginuo maoy pasangil sa pastor nga nang-scam og milyones

Usa ka pastor sa Estados Unidos ang nasakpan nga nibaligya og cryptocurrency ug namulsa og di mominos sa 1.3 milyones dolyares o kapin sa P73 milyones ug niingon nga iya lang gibuhat kon unsay giingon sa Ginuo kaniya.

Ang uban sa kwarta iya pang gigamit sa pagpa-remodel sa iyang balay. Nag-atubang karon og kaso ang magtiayon nga sila si Eli Regalado ug asawa niini nga si Kaitlyn human matod pa ilang gihaylo ang mga kauban sa simbahan ngadto sa INDXcoin nga nigarantiya nga makapadato sa investors.

Dugang sa kaso nga gi-file ngadto sa Colorado Attorney General’s Office nga nasuta sa mga imbestigador nga 300 ka mga tawo ang nakuhaan og di mominos sa 3.2 milyones dolyares nga si Regalado ug ang asawa niini nagkanayon nga kini gipaluyuhan sa Ginuo.

Kini bisan pa man ang magtiayon nga nagpadagan og “online church” way kasinatian sa cryptocurrency, sumala sa press release sa Colorado Division of Securities.

Human reklamo, nikompisal si Regalado nga iya lang gibuhat ang mensahe sa Ginuo kaniya. Iya sab giangkon nga ang ubang kwarta gigamit sa pagpaayo sa ilang balay sanglit kini ang sugo sa kahitas-an kaniya, sigun sa taho sa Yahoo.

“So the charges are that Kaitlyn and I have pocketed $1.3 million, and I just want to come out and say that those charges are true,” sigun niya sa video sa usa ka forum alang sa INDXcoin investors.

“Out of that 1.3, half a million dollars went to the IRS and a few $100,000 went to a home remodel that the Lord told us to do.”

Dugang sa taho nga ang ubang pondo gipamalit sab nila og mga mahalon nga gamit sama sa mga alahas, usa ka Range Rover, mga bag ug biyahe. Human napasaka ang kaso, giangkon ni Regalado nga posibleng adunay “miscommunication issues” sa iyang hotline sa Ginuo.

“We took God at his word and sold a cryptocurrency with no clear exit. Either I misheard God... or God is still not done with this project. What we’re praying for... is that God is going to work a miracle in the financial sector. He is going to bring a miracle into INDXcoin,” ni Regalado.

“We allege that Mr. Regalado took advantage of the trust and faith of his own Christian community and that he peddled outlandish promises of wealth to them when he sold them essentially worthless cryptocurrencies,” sigon ni Colorado Securities Commissioner Tung Chan. /

■ GINUO ANG PASANGIL: Usa ka pastor sa Estados Unidos ang gireklamo human nang-scam sa mga tigsunod sa simbahan niini nga mo-invest sa cryptocurrency. Kapin sa P73 milyones ang na-scam sa maong pastor sa iyang mga kauban sa simbahan.