MRS. NAKIGDIBORSIYO SA IYANG BANA KAY DI MALIGO
Nahimo’ng basehanan sa usa ka ginang nga Turkish national sa iyang gisang-at nga divorce batok sa iyang bana nga dili mangatiman sa kaugalingon, sama sa pagkaligo ug pag-sepilyo sa iyang ngipon.
Tungod niini, nanimaho ang maong lalaki resulta sa iyang poor hygiene nga maoy nagtukmod sa iyang asawa nga putlon ang ilang kaminyuon.
Napatik sa PEP Kuwentong Kakaiba, ang maong asawa nisang-at sa iyang reklamo ngadto sa 19th Family Court sa Ankara, ang capital sa Turkey.
Base sa reklamo sa asawa nga nanimaho’ng anghit, ug labaw sa tanan tapulan nga mosepilyo sa iyang mga ngipon ang iyang kapikas, ug nag-antos ang reklamante sa maong sitwasyon.
HUGAWAN?
Sigun sa abogado sa reklamante nga adunay higayon nga maabtan og lima ka adlaw nga way ilis ang iyang bana.
Aron mas molig-on ang reklamo, adunay mga witness nga gipresentar ngadto sa korte aron sa pagpamatuod sa maong pasangil o reklamo.
Ang mga witness gilangkuban sa ilang mga higala ug kaubanan sa trabaho sa bana ug nakompirmar kay bisan sila nakasaksi sa kahugawan sa maong lalaki.
Sigun sa mga officemate nga daw gi-‘torture’ sila sa higayon nga moabot ang maong lalaki sa trabahoan tungod kay mangalisbo ang anghit niini.
KORTE MIPABOR
Ang korte niaprobar sa hangyo sa asawa nga makig-diborsiyo ngadto sa iyang kapikas.
Gipabayad ang bana og kapin sa P890,000 isip danyos tungod kay nag-antos ang misis sa maong sitwasyon su’d sa ilang kaminyuon.
Base sa Turkish law, natala nga: “Spouses must fulfill the responsibilities of the shared life.
“If the shared life becomes unbearable due to behavior, the other party has the right to file for divorce.”
Base sa Turkish law ang divorce nabahin sa duha ka kategoriya – special reasons ug general reasons. Nalakip sa general reasons nga gikinahanglang magkasinabot ang magtiayon alang sa malungtaron nga kaminyuon.
Sa kaso sa maong magtiayon, ang kahugawan sa partner rason nga dili magkasinabot, moresulta sa ‘unbearable’ nga kinabuhi sud sa ilang kaminyuon hinungdan sa away. Tungod niini, ang korte nipabor sa asawa nga makig-diborsiyo.
Ang abogado nitambag nga gawas sa pakigrelasyon, importante nga moatiman dili lang sa pamatasan, lakip na ang proper hygiene.
Wa matino og unsay rason kon nganong dili maligo ug mang-tootbrush ang maong bana sa regular basis. /