‘WHITE LADY’ GIDAKOP, GISILUTAN SA BARANGAY

Tungod sa ilang gihimo nga prank, pinaagi sa pagpanghadlok gamit ang bayhon sa ‘white lady’, mga menor ug ilang ginikanan pangsilutan sa mga barangay official sa dakbayan sa Bogo.

Prank ra diay nga adunay white lady nga nagbarog-barog taliwala sa kangitngit nga giiwagan og duha ka kandila sa kalsada sa Barangay Anunang Sur, Bogo City, amihanang Sugbo.

Ang culprit mao ang lima ka mga batan-on, tulo kanila pulos mga menor de edad, nga gipatawag sa barangay officials sa Lunes sa gabii, Pebrero 5, 2024.

Ningresponde ang mga tanod sa Barangay Anunang Sur sa dihang nakadawat og reklamo nga adunay grupo sa mga batan-on nga nanghadlok sa mga moagi nga motorista.

Sigun sa saysay ni Barangay Kapitan Jeanelyn Tabaco sa Superbalita Cebu pinaagi sa telepuno nga adunay motorista nga nalisang nga nagsubay sa kalsada sa maong dapit kay adunay duha ka mga kandila nga nagsiga sa dan.

Nisamot ang iyang kahadlok sa dihang adunay white lady nga nagbarog sa daplin sa kalsada.

Pagrespondi sa mga tanod, ilang naabtan ang maong mga batan-on nga diha sa dan nagpaabot sa sunod nilang biktimahon.

GINIKANAN GIPATAWAG

Gidala sa mga tanod sa barangay hall ang mga batan-on. Ang ilang tagsa-tagsa ka mga ginikanan gipatawag sa barangay sa Martes, Pebrero 6, 2024.

Atol sa dialogue, nasuta nga “for video purposes” nga i-post sa social media ang gihimo sa mga batan-on nga nanghadlok sa mangagi nga motorista.

Ang 17 anyos nga babaye nga nagsilbing aktres sa iyang karakter nga white lady, matod pa, igo lang siya magbarog sa daplin sa dan nga magkupo og puti nga habol, samtang iyang taas nga buhok gitabon sa iyang nawong.

Gipasabot sa opisyal sa barangay ngadto sa mga batan-on ug ngadto sa ilang ginikanan ang kadelikado sa prank nga posibleng makadisgrasya sa mga motorista.

Dako sab ang posibilidad nga ang mga batan-on madisgrasya sa ilang gihimo.

Tungod sa ilang gihimo, sila gisilutan og community aron maleksiyon sa ilang gihimo.

Gipahinumduman ang mga gikinanan nga sa alas 10:00 sa gabii ang ilang mga anak kinahanglan nga naa lang sulod sa balay tungod sa ilang gipatuman nga curfew. /