Mapaklaro sa korte
Ang Kagamhanan sa Dakbayan sa Sugbo pormal nang nipasaka og reklamo batok sa duha ka mga tawo nga giingong nagpaluyo sa Facebook page nga ‘Cebu Updates’. Si Estela Grace Rosit, pangulo sa Cebu City Public Information Office (PIO), maoy nirepresentar sa Dakbayan sa pagpasaka sa kasong kalapasan sa Republic Act (RA) 10175 o Cybercrime Prevention Act of 2012 batok kanila ni Erwin dela Cerna ug Christian Tura.
Sumala sa gipasaka nga kaso, ang ‘Cebu Updates’ gipananag-iya o property sa lokal nga kagamhanan sa Dakbayan human kini nagsilbi nga kanhi opisyal nga PIO page sa miaging administrasyon ni anhing mayor Edgardo Labella.
Ang Cybercrime Prevention Act of 2012 gihubad isip ‘computer-related identity theft..”
Apan, atol ning pagsuwat, ang mga hingtungdan nga gihinganlan sa kaso nga nagpaluyo sa padayong operasyon sa ‘Cebu Updates’ wala pay opisyal nga tubag sa maong akusasyon.
Ang kasamtangang administrasyon ni Mayor Michael Rama dunay iyang Facebook page nga gidumala sa PIO hinungdan usab sa kalibog kon kinsay nanag-iya sa Cebu Updates.
Maayong gipasaka sa korte ang reklamo aron maklaro labi na nga ang naasoy’ng page daghan og paukyab ug kontrobersyal nga gipangbutyag bahin mismo sa lokal nga kagamhanan ug mga opisyal sa dakbayan.
Gawas pa, ang nakapadugang sa pagkakontrobersyal mao ang following o mga sumosunod sa page tungod sa pag-apas sa engagement nga usa sa dakong sukdanan sa kalampusan sa presensiya sa page.
Gani, sa mga pribadong o personal nga accounts sa Facebook, mahimo kining ma-monetize o makakwarta tungod sa pagsulod sa daghang advertisements mao nga daghang magapas sa sumosunod sa page.
Sa maong kontrobersiya mas nangalisbo hinuon ang pulitika sa kaysa kuwarta hinungdan nga init. Apan napasang-at na ang maong kaso sa korte ug kini ang modeterminar sa legalidad ug mohukom alang sa pagpaklaro sa tanan.