Solar power plant tukuron sa Daanbantayan

Gikatakda nga paliton sa Kapitolyo ang pipila ka mga luna sa lungsod sa Daanbantayan nga tukuran og solar power plant.

Kini maoy gipahibalo sa Kagamhanan sa Lalawigan diin nasayran nga 56 ka lot owners sa Barangay Talisay, Daanbantayan gipahibalo na sa kagamhanan sa maong kalamboan atol sa tigom nga gipangulohan ni Cebu Governor Gwendolyn Garcia kauban sila si Daanbantayan Mayor Sun Shimura ug mga opisyal sa Barangay Talisay sanglit malakip ang ilang mga luna sa katukuran sa solar power plant.

Ilang nasabutan nga abagan niini ang LGU sa mga housing ug relocation project nga gitinguha niini.

Nasayran nga anaa sa 185-ektaryang luna ang gikinahanglan sa kagamhanan aron matukod ang proyekto nga pangulohan sa Spanish firm nga Acciona Energia Global and Freya Renewables.

Ang power plant nga gipaagi sa usa ka venture sa Acciona ug Kapitolyo gilantaw nga maka-produce og 150 megawatts sa kuryente, nga makaabag sa power supply generation capacity nga labing gikinahanglan sa Central Visayas ug kasikbit niining mga rehiyon.

Kahinumdoman, ang isla sa Panay nakasinati sa labing taas nga power outages sulod sa tulo ka adlaw sayo sa Enero ug laing duha ka semana nga way supply sa kuryente tungod sa kakulian sa power plants.

Una na nga niluwat og pamahayag si Presidente Ferdinand Marcos Jr. sa giingong urgency sa pagtubag sa sitwasyon sa power outages gumikan sa posibling economic losses niini, dili lang ang epekto sa mga panimalay apan lakip na ang mga trahaho ug patigayon.

Subay sa nasabutan, bayran sa kagamhanan ang mga nanag-iya sa luna nga maapektuhan sa proyekto subay sa lagda sa pangagamhanan pinaagi sa expropriation proceedings.