7-ka-buwan nga voter’s registration moabli karon

Magsugod karong adlawa, Pebrero 12, ang pito ka buwan nga rehistrasyon sa Commission on Elections (Comelec) sa tibuok nasod hangtod sa Septiyembre 30, 2024, alang sa mid-term national ug local elections sa Mayo 2025.

Kini ang gipahibalo ni Omar Sharif Dilangalen Mamalinta, tigpamaba sa Commission on Elections (Comelec) Cebu, sa pakighinabi sa Superbalita Cebu sa Miyerkules, Pebrero 7, 2024.

Matod ni Mamalinta nga ipatuman usab sa Comelec ang satellite registrations aron maka-akumodar og mas daghang magparehistro.

Iyang gipasabot nga ang mga institusyon ug mga buhatan mahimo’ng mohangyo sa pagpahigayon og mga rehistrasyon sa lainlaing lugar, sama sa malls, unibersidad, ug mga barangay. Hinuon, iyang gitumbok nga kinahanglang adunay labing menos 200 ka mga magparehistro.

Apan dason ni Mamalinta, ning unang mga semana o buwan sa rehistrasyon, ang buot moparehistro kinahanglan moadto sa labing duol nga buhatan sa Comelec samtang nagpahan-ay pa sila alang sa mga dapit sa satellite registration.

Samtang, dason niya, dunay satellite registration pinaagi sa Register Anywhere Program (RAP), diin duha ka pasiunang kalihukan ang ila nang gitakda sa dakbayan sa Sugbo ug Mandaue.

Ang RAP nagtumong sa paghatag og dugang nga mga kapilian o oportunidad alang sa pagrehistro sa mga botante, labina sa mga tinun-an ug nagtrabaho nga naa sa laing dapit.

Pinaagi sa RAP, dili sila kinahanglan nga mouli sa ilang tagsa-tagsa ka dapit aron magparehistro apan ang ilang record adto mabutang sa dapit kon asa sila mobotar sa eleksiyon.

Gawas sa pagtutok sa rehistrasyon, si Mamalinta nagkanayon nga subsob usab ang ilang paghimo og voter’s education.

Gihisgutan ni Mamalinta nga sa pagkakaron, ilang tutokan ang pag-accommodate sa registration requests nga giproseso sa lainlaing election offices.