P100M nga drugas nasakmit

Kapin sa P100 milyunes nga balor sa ilegal nga drugas ang nasakmit sa kapulisan sa Central Visayas sulod sa tulo ka adlaw nga police operations nga nagsugod niadtong Pebrero 8 hangtod sa Pebrero 10, 2024.

Nikabat usab sa 652 ka mga suspek ang nasikop, uban kanila nalambigit sa kaso sa drugas ug ubang mga krimen.

Sa data nga gibutyag ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, hepe sa Police Regional Office (PRO 7), nga sulod lang sa maong mga adlaw, nakasakmit ang kapulisan sa Central Visayas og 14,796.46 gramos sa gituohang shabu nga dunay standard drug price nga P110,615,928 ug 60 gramos nga marijuana nga dunay balor nga P7,200 nga niresulta sa pagkasikop sa 214 ka drug personalities.

Matod ni Pelare nga nimando si Aberin sa iyang mga personnel nga palawman ang ilang imbestigasyon kon asa gikan ang supply sa ilegal nga drugas ug asa usab kini paingon aron hingpit mapugngan ang pagkatap niini sa CV.

Ang labing dako nga nakuha mao ang operation sa mga sakop sa Regional Police Drug Enforcement Unit 7 uban sa Regional Intelligence Division diin nakasakmit sila og 10 kilos sa gituohang shabu nga dunay standard drug price nga P68 milyunes gikan sa usa ka Elmer Saguran, alyas Budok, sa sulod mismo sa Ludo Memorial Park sa A. Soriano Avenue, Barangay Carreta, dakbayan sa Sugbo.

Nakuha sa kapulisan ang dagko’ng mga putos sa gituohang shabu nga gisulod sa Chinese tea bag nga nagpasabot nga gikan kini sa kaulohan.

Kapin usa ka kilo ang nasakmit sa Cebu City Police Office (CCPO), usa ka kilo sa Mandaue ug dakbayan sa Talisay samtang ang uban nakuha sa lain-laing provincial police offices sa CV.