HUWES SIGE’G TEXT ATOL SA HUSAY, GITANGTANG

Oklahoma City - Usa ka huwes sa Oklahoma niuyon nga mokanaug sa katungdanan kaniadtong Biyernes human siya nasakpan nga nagpadala og gatusan ka mga text message gikan sa bench samtang nag-hearing sa usa ka husay sa kasong murder sa pagpatay sa usa ka 2-anyos nga batang lalaki, lakip ang mga mensahe nga nagbiaybiay sa mga piskal ug giubanan og emojis.

Niuyon usab si District Judge Traci Soderstrom nga dili na siya magtinguha og posisyon sa judicial office sa Oklahoma ubos sa gikasabutan sa husay nga gisang-at sa Korte sa Hudikatura sa Oklahoma.

Nag-atubang siya og reklamo'ng pagtangtang gikan sa hukmanan tungod sa mga akusasyon nga naglakip sa grabeng pagpabaya sa katungdanan, pagpanaugdaug samtang nangatungdanan, kakuwang sa maayong pamatasan ug kapakyas sa pagdumala sa iyang opisina.

Si Soderstrom gikatakdang husayon sa usa ka espesyal nga korte sugod sa Pebrero 12.

“I promised to uphold the Constitution in a fair, even-handed and efficient manner,” matod ni Soderstrom sa usa ka resignation letter nga gihatag ngadto sa local media.

“I believe that I have done so. However, being human, I have also faltered.”

Girekomendar ni Oklahoma Supreme Court Chief Justice John Kane IV nga tangtangon si Soderstrom human sa imbestigasyon diin siya napalgan nga nibugalbugal sa mga prosecutor, gikataw-an ang komento sa bailiff bahin sa kinatawo sa usa ka piskal, gidayeg ang abogado sa depensa ug gitawag nga bakakon ang importanteng saksi sa piskal sa panahon sa husay sa kasong pagpatay batok kang Khristian Tyler Martzall.

Ang security video nga gipatik sa The Oklahoman nagpakita kang Soderstrom nga nagtext o nag-message sulod sa pipila ka mga minuto sa usa ka higayon atol sa pagpili sa hurado, pagbukas sa mga pamahayag ug pagpamatuod atol sa hearing sa Chandler, mga 45 ka milya (72 ka kilometro) gawas sa Oklahoma City.

Si Soderstrom, kinsa milingkod sa katungdanan sa miaging tuig, boluntaryong misuspenso sa iyang kaugalingon niadtong Oktubre.

Ang mga text sa huwes sa panahon sa husay sa kaso ni Martzall sa iyang pagpatay sa 2-anyos nga anak nga lalaki sa iyang uyab naglakip sa pag-ingon nga ang piskal “sweating through his coat,” sumala sa petisyon ni Kane.

Gihulagway sa mga text ang abogado sa depensa nga “maayong laki” ug nangutana “can I clap for her?” atol sa pangbukas nga mga argumento sa abogado sa depensa. Sa kinatibuk-an, nagpadala si Soderstrom og sobra sa 500 ka mga text ngadto sa iyang bailiff.

Gi-text usab ni Soderstrom gamit ang usa ka icon sa nagkatawa nga emoji sa bailiff, nga “made a crass and demeaning reference to the prosecuting attorneys' genitals,”misulat si Kane.

Sa kadugayan si Martzall nakonbikto sa second degree nga manslaughter.

/ AP ■ TEXT: Kining hulagway gikan sa security camera video, siLincoln County District Judge Traci Soderstrom nagbasa sa iyang cellphone atol sa usa ka murder trial niadtong Hunyo 12, 2023 sa Lincoln County District Court sa Chandler, Oklahoma. Niuyon siya nga mo-resign isip settlement sa kaso batok kaniya sa iyang pagbugalbugal sa mga prosecutor sa kaso nga iyang gihusay.