Wa kadawat gihinganla’g chaka, ‘mipatay’
Nadakpan sa kapulisan sa Davao City ang 20 anyos nga construction worker nga gitumbok nga suspek sa pagpatay sa 14 anyos nga dalagita nga iyang gika-meet up niadtong Pebrero 7.
Si Jesson Inot Tugahan nga taga Barangay Dumoy, Davao City nadakpan human sa gihimong manhunt operations sa kapulisan niadtong Huwebes, Pebrero 8 sa alas 10 sa buntag.
Sa interview sa suspek sa usa ka vlogger nga nagbase sa Davao, iyang giangkon ang iyang nahimo’ng krimen tungod sa iyang kapungot ngadto sa batan-ong biktima nga iyang ka-chatmate sa social media.
“Na-ulit (nasuko) ko niya kay nagsige siya og bugal-bugal nako ba,” tipik sa pamahayag ni Tugahan sa maong interview.
Base sa imbestigasyon sa Davao City Police Office (DCPO), di pa lang dugay nagkaila ang suspek ug biktima pinaagi sa social media.
PROFILE PICTURE
Gikataho’ng nadani ang batan-ong biktima kay guwapo ang picture nga gigamit sa suspek sa iyang profile sa iyang Facebook account.
Hangtod nga nagkasabot ang duruha ug nagkauyab sa ilang pagpunay og chat-chat ug nakahukom nga magkita sila sa personal.
Sa ilang panagtagbo, giingong nakurat ang biktima sa dihang lahi ang hitsura ni Tugahan sa personal itandi sa profile picture niini sa social media.
Base sa migawas nga taho sa 91.5 Brigada News FM-Davao, gihinganlan ang suspek og ‘chaka’ (bati og nawong) sa biktima.
Nitumaw sab sa report nga gisagpa sa biktima si Tugahan ug gumikan adto mibalos ang suspek pinaagi sa paghapos og kahoy ngadto sa iyang chatmate.
GIPATAY
Wa pa matagbaw, gihapsan sab og bato ang ulo sa biktima nga niresulta sa iyang kamatayon.
Natultolan ang lawas sa biktima nga nagbuy-od sa kasagbutan sa Purok 3, Cogon, Barangay Bato, Toril District, Davao City sa dihang ang igsuon sa gipatay nakadawat og distress call gikan kaniya ug nakahigayon pa og pangayo og tabang.
Dali nga nirespondi ang kapulisan ug patay nang naabtan ang biktima sa maong dapit diin nagkadugo ang ulo niini.
Atol sa pagkakaplag sa biktima, wa pa mailhi kon si kinsa ang mihimo sa maong krimen, apan sa backtracking sa kapulisan pinaagi sa mga CCTV footage nga ilang gisusi, katapusan nga nakita nga buhi ang babaye kuyog sa wa pa mailhing lalaki nga nanggawas gikan sa usa ka establisemento. /