Epekto sa pagpalambo sa kabukiran

Grabe na kaayo ang mga land development sa kabukiran sa Metro Cebu. Ang mga kakahuyan kaniadto kadaghanan mga subdivision na. Ang kayutaan kaniadto nga grabe ka barato, karon mahal na kaayo. Laing pagpalambo mao ang religious ug farm tourism. Dunay mga dapit nga gipalambo isip religious sites. Sama aning padayon nga gitrabaho nga higanteng imahen sa Divine Mercy sa Brgy. Sirao, dakbayan sa Sugbo.

Tulo na diay ni ka tuig nga gitrabaho, apan karon lang nabaniug sa publiko tungod sa social media post ni Konsehal Pastor “Jun” Alcover. Ang nakadani og maayo sa netizens mao ang daghang mga unggoy sa dapit.

Gikan sa 10, matod ni Alcover, naa na kini karon sa mga 50. Kon kaniadto problema sila sa mga mag-uuma, karon di na kay ang mga nag-atiman sa site development nagtagad usab sa mga unggoy. Ila ning gipakaon. Hayan usa ni sa mga hinungdan sa pagpanaghan nila sa dapit.

Hayan kaniadto wa ni manggawas ang mga unggoy kay nangahadlok sa mga tawo kay pamatyon sa mga lumolupyo kay giisip sila nga dangan nga nagdala og kadaut sa pananom.

Si Father Loreto Jaque sa Archdiocese sa Sugbo nagpahinumdom sa mga magtutuo nga Katoliko nga ang pagpakita sa pagtuo ug pagmahal sa Diyos wa diha sa mga imahen lang, kon di ang pagpakita sa pagrespeto sa kalikupan nga gipuy-an sa mga di tawo, sama sa mga unggoy.

Mag-unsa man tuod ang pagtuo kon kini nakadaut sa kalikupan, sa pinuy-anan sa mga mananap nga kabahin usab sa ekolohiya?

Di ba diay pwede mag-ampo o magrosaryo sa balay, sa simbahan, kapilya ug mga dapit nga mahimo kang mag-inusara sa pagpakigsulti sa Diyos? Gikinahanglan bang naa gyud ang presensya sa imahe?

Mag-unsa man ang kalambuan kon kini nakaguba usab sa kalikupan, naandan nga pinuyanan sa mga mananap? Mao tingali nga nanggawas ang mga Banakon kay nadisturbo na sila sa ilang naandan nga pinuy-anan.

Okay ang pagpalambo, apan balansehon kini nga di makadaut sa kalikupan.