Kuwang ang traffic advisory
Di lang sa Valentine’s Day naghuot ang trapiko sa Dakbayan sa Sugbo. Sa Huwebes sa buntag, wa nakairog ang trapiko sa Osmeña Boulevard tungod sa pagguba sa duha ka mga skywalk alang sa paghatag og dalan sa Cebu Bus Rapid Transit (CBRT).
Mubo ra kaayo ang panahon sa pagpangandam alang sa pagguba sa duha ka mga skywalk. Labing minos duha ka mga semana, nag full blast na unta ang traffic office, pinaagi sa mga pahibawo sa karsada ug pagpatawag sa mga sakop sa media, gikan sa radyo ngadto sa mga newspaper.
Nag radio hopping sa mga sibyaanan aron makalingkod sa prime time program sa mga radyo. Himuon ba nga maorag dako nga event ang pagguba, sama sa pagpakatap sa impormasyon sa rerouting sa trapiko sa Sinulog.
Hayan di ingon niadto kangil-ad ang mahitabo. Unya sa sayo pa nga oras, gisirhan na ang Osmeña Blvd.
Kini nga mga lakang wa mahimo sa traffic office. Hayan nagsalig nga naa na silay kaugalingon nga social media page, ingon man ang City Hall.
Apan di tanang mga tawo mobukas sa ilang social media page. Matag tawo dunay iyahang ganahan nga paminawon nga estasyon, basahon nga social media page, sagad iyaha sa lehitimo nga media organization nga nag-post og di bias, verified nga mga impormasyon. Naa diha ang tanang mga impormasyon.
Sa SunStar Cebu ug Superbalita Cebu lang daan nga social media pages, minilyon ang nagsunod niini. Naandan na sa readers nga moadto niini kon balita ang ilang gipangita.
Naa say mga tawo nga mas nagsalig sa broadcast sa radyo ug telebisyon. Lapad sila og reach itandi sa mga himan sa City Hall nga nagsalig lang sa social media pages.
Di igo ang social media pages sa local government unit (LGU) kay bisan unsaon, mas lapad og followers ang traditional nga media tungod kay nasayod ang publiko nga mas daghan sila og makuha nga credible nga impormasyon. Mas lapad usab ang mga impormasyon, lahi sa social media pages sa kagamhanan nga naka-focus lang sa ilang mga kalihukan.
Unta, gamay man o dako nga mga kausaban nga makaapekto sa dagan sa trapiko, tratahon kini nga dinalian, importante, dako nga kalihukan. Gamiton ang tanang mga pamaagi sa pagpakatap sa traffic advisory aron dunay igong panahon nga mapahimangnoan ang publiko.
Sa nahitabo kagahapon, pila kaha ka mga tinun-an ug trabahante ang nanga-late? Wa ba kahay nabiyaan sa barko nga ila untang sakyan? Di lalim ang matanggong sa trapiko.