2 PATAY, 1 GRABE SA BANGGA
Patay ang duha ka mga drayber samtang talandugon ang kahimtang sa usa ka angkas sa panagbangga sa motorsiklo sa Provincial Road, Barangay Mainit, dakbayan sa Naga, alas 7:00 sa gabii, Sabado, Pebrero 17, 2024.
Usa sa namatay mao si Crisen Gallana Cabalan, 51, minyo, samtang kritikal mao ang iyang angkas nga asawa nga si Perigrina, hamtong ang panuigon, ug taga Barangay Uling, Naga.
Laing namatay mao si Dexter Bartiana, hamtong ang panuigon, trabahante sa usa ka woodcraft company ug taga Barangay South Poblacion, Naga.
Si Police Staff Sgt. Niel Villaceran, imbestigador sa Naga Police Station nga nahinabi sa Superbalita Cebu, nagkanayon nga ang magtiayong Cabalan, padulong nga mopauli sa ilang panimalay sa Barangay Uling, sakay sa ilang motorsiklo.
Matod ni Villaceran, si Bartiana hubog ug walay helmet samtang wala kini mananghid sa tag-iya sa motorsiklo sa silingan nga iyang gigamit.
Si Bartiana gikan sa Barangay Lutac, Naga ug giingong dunay gikuha apan kusog nga nakapadagan sa motorsiklo sa iyang pagbalik.
Dugang ni Villaceran, ni-overtake kini sa usa ka bus nga de pasaheroan hinungdan nga nakabangga sa gikasugat nga motorsiklo nga gisakyan sa managtiayon.
“Alas 3:00 sa hapon niadtong Sabado (Pebrero 17) nagtagay si Bartiana kay sweldo lagi. Unya wala mananghid gikuha ang motorsiklo sa silingan miadto sa Brgy. Lutac, pagbalik kusog nakapadagan,” dugang ni Villaceran. Gumikan sa kakusog sa impact, ang duha ka mga drayber gideklarar nga dead on arrival (DOA) sa pribadong ospital sa Naga.
Samtang ang asawa ni Cabalan, kritikal ug wala pa maulii sa iyang panimuot atol ning pagsuwat./