‘Gunman’, 2 ka kauban nadakpan sa buy-bust
Usa ka drug personality nga nalambigit usab sa kasong pagpamusil niadtong Pebrero 1, 2024 nadakpan uban sa laing duha ka kauban sa Sawang Calero Police Station sa Cebu City Police Office (CCPO) atol sa buy-bust alas 11:10 sa gabii sa Dominggo, Pebrero 18, 2024, sa Taboan, Barangay San Nicolas Proper, dakbayan sa Sugbo.
Nakuhaan og drugas ug armas mao ang mga suspek nga sila si Oneil Deiparene Llatona, alyas Onel, 22, target sa operasyon, giilang high value individual, taga Sitio Urasi, Brgy. Sambag 1, siyudad sa Sugbo.
Lakip sa nadakpan ang iyang mga kauban nga silang Fernando Alilin Lariosa, 48, taga dalan B. Aranas, Brgy. San Nicolas Proper; ug Adrian Ducay Adolfo, 18, taga Sitio San Vicente, Brgy. Duljo Fatima, ning dakbayan.
Nakuha gikan kang Oneil ang mga pinakete sa gituohang shabu nga motimbang og 20.12 gramos nga dunay standard drug price nga P136,816.00 ug usa ka kalibre .45 nga pistola.
Samtang, tag lima ka gramo nga shabu ang nakuha sa posisyon nilang Lariosa ug Ducay.
Matod ni Police Major Francis Renz Talosig sa Sawang Calero Police Station, si Llatona gitudlo nga responsabli sa pagpamusil sa iyang area niadtong Pebrero 1, 2024 ug gikiha og kasong frustrated homicide sa korte.
GIPUSIL
Giingong mamarukay o drug pusher naangol human gipusil alas 3 sa kaadlawon sa Lunes, Pebrero 19, 2024, sa Sitio San Juan, Brgy. Mambaling, ning siyudad.
Si Jonryl Telarion, 29, ulitawo, samdan sa tuong tiil ug tuong kamot. Wa pa mailhi sa kapulisan ang nag-inusarang gunman kay matod sa biktima wa siya nakamay-ong.
Si Police Corporal Marlon Catipay, imbestigador sa Mambaling Police Station nga nahinabi sa Superbalita Cebu, nagkanayon nga naghigda sa duyan ang biktima ug kalit lang gipusil.
Ang biktima gidali sa pagdala sa ospital.
Matod ni Catipay nga ang biktima naila sa lugar nga mamarukay.