4 nangasikop sa mga buy-bust

Usa ka construction worker uban sa iyang kunsabo nadakpan sa buy-bust sa alas 4 sa hapon sa Dominggo, Pebrero 18, 2024, sa Purok Banika, Sitio Sambag, Brgy. San Vicente, lungsod sa Liloan, amihanang Sugbo.

Ang mga suspek giilang sila si Raul Tolo Estrera, alyas Titing, 48, minyo, nagpuyo sa maong lugar ingon man si Melvin Talisic Atis, 41, ulitawo.

Si Police Major Eric Gingoyon, hepe sa Liloan Police Station nga nahinabi sa Superbalita Cebu pinaagi sa telepuno, niingon nga atol sa buy-bust, ang mga suspek nakuhaan og 11 ka putos sa shabu, laing usa ka medium size nga putos ug P500 nga buy-bust money.

Ang drugas ningtimbang og 5.55 gramos nga mobalor og P37, 740.

Matod ni Gingoyon, ang suspek notado na sa ilang dapit.

Dugang ni Gingoyon, giingong dunay kontak ang suspek nga piniriso sa Cebu Provincial Detention and Rehabilitation Center (CPDRC) nga nag-supply kaniya og shabu pinaagi sa pagsugo og sakop niini sa gawas.

CEBU CITY

Gibanabana’ng 60.6 gramos nga gituhoang shabu nga mobalor og P411,000 nasakmit gikan sa duha ka giilang high value individuals (HVIs) nga nasikop atol sa buy-bust sa mga sakop sa Drugs Enforcement Unit sa Mambaling Police Station alas 11 sa gabii sa Dominggo, Pebrero 18, sa Basak San Nicolas, siyudad sa Sugbo.

Ang operasyon sa kapulisan ubos sa kamandoan sa ilang station chief nga si Police Maj. Jonathan Bethooven Taneo ug sa koordinasyon sa Philippine Drug Enforcement Agency 7.

Ang suspek nga giilang si Raven Bautista, alyas Bordz, 25, ulitawo, taga Quiot Pardo, ning dakbayan, nakuhaan og 12 ka medium sized, lima ka gamay nga pakite sa gituohang shabu ug .38 nga kalibre nga revolver nga may duha ka mga bala.

Laing nasikop mao si Cheldon Kyamco,19, ulitawo, taga Basak San Nicolas ug nakuha sa iyang posisyon ang P200 nga buy-bust money ug usa ka gamay nga pakite sa gituohang shabu.

Ang duha gibalhog na sa selda sa Mambaling Police Station samtang nagpaabot sa tukmang kaso nga ipasaka batok kanila.