Way disiplina sa karsada
Lain na sab nga kinabuhi ang nakalas niadtong Sabado, Pebrero 17, sa gabii sa dakbayan sa Naga. Nagkabangga ang duha ka mga motorsiklo, ang usa ka drayber giingong hubog ug ni-counterflow hinungdan nga nadasmagan ang magtiayon nga nag-angkasay sa lain nga motorsiklo.
Namatay ang duha ka mga drayber samtang ang asawa sa usa sa mga drayber kritikal.
Ikapila na kaha kini sila dinhi sa Metro Cebu nga nangamatay sa aksidente sa trapiko tungod sa pag counterflow, apan gipasagdan lang sa traffic authorities kining makuyaw nga buhat, sagad sa mga tigmotorsiklo.
Nadugayan, nahimo na kini karon nga normal kaayo ug nagtuo nga legal kini nga buhat kay bisan sa solid yellow line, magpahaguros sa pagpadagan ang nag counterflow. Mangasuko pa kon badlungon o dunay masuko nga drivers nga kasugat nga wa nakauyon sa ilang gibuhat.
Mangasuko sab sila sa traffic enforcers kon badlungon kay gadali lagi kuno sila. Ang kuyaw ug ilegal nga buhat sa karsada nahimo na lagi nga “legal” ug normal kay kuwang og political will ang lokal nga kadagkuan sa kagamhanan. Mangahadlok nga moresbak ang mga drayber panahon sa eleksyon tungod sa ilang kadaghan.
Apan maghisgot og disiplina sa karsada? Unsa may nag-unang pagpakita sa kakuwang sa disiplina? Ang counterflowing ug ikaduha ang di pagtahod sa traffic signs ug traffic lights. Mga buhat nga naghulga gihapon sa kinabuhi sa mga motorista sa karsada.
Kon maghisgot man gani og disiplina, di lang pilion ang mga lugar asa kini ipatuman. Di lang sab pilion ang mga matang sa violation nga higpit nga santaon.
Kusog kaayo mang clamp sa mga sakyanan nga nag overnight parking o motorsiklo nga gibilin og makadiyot sa daplin sa dan nga wa nakababag sa trapiko. Apan wa makabadlong sa mga sakyanan nga gi-park sa karsada kay rich ang sagad sa mga tag-iya nga nangaon lang. Dunay pabor pabor?
Kon mangdisiplina sa mga motorista, tarungon ug patas ang pagpatuman sa balaod sa trapiko. Mangdisiplina man kaha? Gikinahanglan man kaha kini aron makuhaan ang kahuot sa trapiko?
Kon patas ang pagpatuman sa balaod sa trapiko, di lang tuhiktuhik, kon kanus-a lang ganahan, ang mga motorista seguradong madisiplina. Madugayan, sila makasabot ra nga ang katuyoan sa pagbadlong sa mga mapasagaron sa karsada, alang ra sa ilang kaayuhan ug kaluwasan. Di tungod kay magpamulta ang kagamhanan isip fundraising, kon di ang tumong mao ang pagpahapsay sa karsada nga gubot pa sa lukot.