Nanglabni dakpan sa nagpatrolya’ng polis

Duha ka habalhabal driver nga nanglabni sa usa ka babaye nga nag-atang og kasakyan sa eskina Pope John Paul II Avenue ug MJ Cuenco Ave., Barangay Mabolo, Dakbayan sa Sugbo, nadakpan sa hot pursuit operation sa Mabolo Police Station.

Ang duha ka mga suspek giila nga sila si Antonio Panlaan Malusay, 52, lumad nga taga Barangay Sagay, dakbayan sa Toledo ug Eugenio Canumay Santa Ana, 29, taga Barangay Binobohan, dakbayan sa Guihulngan, Negros Oriental.

Sa imbestigasyon sa Mabolo Police Station nga alas 3:50 sa Martes sa kaadlawon, Pebrero 20, 2024 samtang nagbarog ang biktima nga si Erica Mae Andrade, 23, usa ka guest relation staff, taga Barangay Luz apan lumad nga taga Barangay Santa Cruz, San Francisco, Camotes, kalit lang nga ning-abot ang mga suspek sakay sa usa ka motorsiklo.

Wala magdahom ang biktima nga ang angkas niini nga si Santa Ana molabni sa iyang shoulder bag nga dunay sulod nga kwarta nga mobalor og P3,800 lakip na ang postal identification (ID) card niini ug dayong sibat.

Apan wa swerte ang mga suspek kay niadtong orasa naa ra sa duol ang tulo ka mga polis nga silang Patrolman Jay Duron, Patrolman Francisco Ramos ug Patroman Gem Dayo ug dali nila ni nga nadakpan.

Nakuha pagbalik ang bag sa biktima lakip na ang kwarta niini ug ang importante nga dokumento.

Kasong pagpangawat ang giandam sa Mabolo Police Station batok sa duha ka mga suspek bisan pa sa pagpangayo’g pasaylo.

Si Police Major Romeo Caacoy, hepe sa Mabolo police station, nagkanayon nga ilang ipaubos sa imbestigasyon ang duha ka suspek kon tinuod bang sila mga habalhabal driver.