248 ka mga armas, 1M ka bala nasakmit
Usa ka lalaki sa Richmond, California, gidakop sa miaging bulan human ang mga otoridad nakakaplag og ilegal nga nagkadaiyang 248 ka mga pusil ug 1 milyon ka mga bala sulod sa iyang balay, matod sa state attorney general sa miaging semana.
Sa taho sa Business Insider, si Attorney General Rob Bonta niingon sa usa ka pamahayag nga ang mao nga tawo, nga wala nganli, legal nga gidid-an sa pagpanag-iya og mga pusil sa California.
Ang mga opisyal nga tigpatuman sa balaod nga nisusi sa balay sa lalaki niadtong Enero 31 nakakaplag og 11 ka military-style machine gun, 133 ka handguns, 37 ka riple, 60 ka assault rifles, pito ka mga shotgun, ug 3,000 ka dagkong-kapasidad nga mga magasin, matod ni Bonta.
Nakaplagan usab sa mga otoridad ang 1 ka milyon ka mga bala sa “miscellaneous caliber ammunition” ug daghang mga rifle receiver ug mga frame sa pistola, matod sa state attorney general.
Daghang mga granada usab ang nadiskubrehan, apan nasuta sa lokal nga bomb squad nga di kini mobuto, sumala sa pamahayag.
Ang balay sa lalaki dunay 20 ka mga silencer ug upat ka mga flare gun, kini miingon.
“In our efforts to retrieve guns
from a prohibited individual, we found hundreds of allegedly illegal weapons and approximately one million rounds of
ammunition,” matod ni Bonta. Ang usa ka video nga gipagawas sa opisina sa attorney general nagpakita sa bahin sa daw gamay nga armory, puno sa gitaod, belt fed nga mga machine gun, tag-as nga mga kalibre nga riple, ug daghang mga kahon sa bala.
Ang dili awtorisado nga pagpanag-iya sa usa ka machine gun ilegal sa California, nga adunay pipila sa labing estrikto nga gun control law sa US.
Ang Armed and Prohibited Persons System sa estado, nga gitukod niadtong 2006, nagsubay sa mga tawo nga legal nga namalit ug nanag-iya og mga armas apan sa ulahi gidid-an sa pagpanag-iya niini.