Nganong wa kapalit og tow truck?

Dako kaayo nga problema sa trapiko matag dunay dagkong mga sakyanan nga mangatanggong sa karsada, sama sa nahitabo niadtong Martes sa buntag, Pebrero 20, sa Cebu South Coastal Road (CSCR). Labing minos mga lima ka oras nangatanggong ang mga sakyanan.

Makita sa hulagway nga gamit ang drone ang taas kaayo nga linya sa mga sakyanan nga niabot bisan na ngadto sa dakbayan sa Talisay. Daghang mga netizen ang nagbagulbol kay nanga-late sa trabaho ug meeting. Daghan ang ningsayo sa pagbiya sa ilang mga balay aron di manga-late, apan tungod lang sa pagka aberiya sa usa ka trak, sila napakyas sa ilang tumong. Makalagot huna-hunaon, di ba?

Sa usa ka siyudad nga ang liderato nagtinguha sa Singapore-like ug Melbourne features, ang wa pagkasulbad sa nagbalikbalik nga problema sa trapiko sa CSCR makauulaw kaayo. Daghan sa netizens ug traffic experts ang nakapangutana kon nganong wa nakapalit ang Siyudad og dagko nga tow truck. Nakapalit gani ang Mandaue

City, nganong ang Cebu City wala?

Ang Cebu City mas dako nga Siyudad ug dunay mas dako nga problema sa trapiko kon itandi sa Dakbayan sa Mandaue. Wa silay CSCR, apan nipalit sila og tow truck tungod kay naa kanila ang duha ka habig sa mga taytayan sa Mactan. Ila kining panagana kon ugaling dunay mga trak nga maaberiya sa taytayan. Panagana gyud.

Apan ang Siyudad sa Sugbo nga dunay CSCR ug Cebu Cordova Link Expressway (CCLEX) way tow-truck. Busa, way nakabitad sa trak nga naaberiya sa dapit niana pang kaadlawon. Matod pa sa netizens, dali kaayo nga makaguroy sa gagmay nga mga sakyanan ug makakarga sa mga motorsiklo daplin sa karsada apan inutil sa pagbitad sa trak nga naaberiya. Tinuod baya ug balido kaayo ni nga pangutana.

Sa kadugay ug nagbalikbalik nga problema sa CSCR ug ubang dagkong mga karsada sa dakbayan, nganong wa man makapalit ang Siyudad og dako nga tow-truck? Mag-Singapore-like man kaha?