‘White lady’ edited diay

Gikalisangan sa katawhan ang usa ka giingong white lady nga nasiplatan nga nagatang sa usa ka tulay alas 10 sa gabii niadtong Huwebes, Pebrero 15 sa Probinsiya sa North Cotabato.

Nag-trending sa Facebook ang hulagway sa giingong white lady nga nagtindog sa tulay sa Barangay Bannawag, utlanan sa Barangay Pisan, Kabacan, North Cotabato.

Sigun sa post nga usa ka lumolupyo sa Barangay Bannawag nga sakay sa motorsiklo ang nakakita sa giingong white lady sa tulay ug iya kining napiktyuran.

Tungod sa post sa social media, grabeng kahadlok ang gibati sa mga lumolupyo sa Kabacan ilabina ang kabatan-unan nga moagi sa tulay panahon sa kagabhion.

EDITED DIAY

Apan sa pagsusi sa local government unit sa Kabacan, usa ka pagpanghadlok lamang ang hulagway sa white lady ug edited kini.

Tumong lamang sa nag-edit sa hulagway nga hadlukon aron dili manggawas ang kabatan-unan panahon sa kabaghion ilabina nga dunay curfew sa mga menor de edad sa lungsod sa Kabacan.

Giklaro sa nag-post nga duna siyay hulagway sa tulay ug iya na nga gipasa sa iyang kaila.

Gipadala kini og balik sa iyaha nga duna nay white lady nga nagtindog sa tulay, apan kini edited lamang.

Pahimangno sa mga otoridad nga mamahimong responsable sa mga post ug kana lamang tinuod aron dili makamugna og kahadlok sa mga tawo.

Dinhi sa Sugbo, mga duha ka semana ang nakalabay, dunay mga batan-on nga gipangdakop sa northern Cebu kay nanghadlok, usa kanila nagpatuo nga white lady ngadto sa mga motorista nga nangagi sa karsada.

Ang mga batan-on, nga giapilan og mga menor, gisilutan og community service uban ang ilang mga ginikanan.