Mikanaug na sa lubi human sa 32 ka oras
Human sa 32 ka oras, ang 29 anyos nga lalaki nga gidudahang high sa drugas nikanaug na gikan sa taas sa lubi sa Sityo Kabagohan, Brgy. Panadtaran, lungsod sa Argao, alas 7:45 sa buntag sa Huwebes, Pebrero 22, 2024.
Si Benjie Pantinople, lumolupyo sa dapit, nikatkat sa lubi alas 10 sa gabii sa Martes, Pebrero 20, 2024.
Kini ang gibutyag sa Superbalita Cebu ni Barangay Kapitan Pacit Villamora sa Panadtaran sa interbyo sa Superbalita Cebu sa Huwebes sa buntag human sa ilang pakignegusasyon.
Tibuok gabii nga diha ra si Pantinople sa taas sa lubi samtang ang mga otoridad ug rescuers naghuwat kaniya sa ubos hangtod nianang pagkabuntag.
Matod ni Villamora, nagkurog si Pantinople ug giatiman sa mga kaliwat sa dapit ug ni-request sila og ambulansiya aron madala sa rehabilitation center.
Dihang nakapundo na kini og kusog, gipakatulog sa kuwarto sa balay sa ig-agaw niini nga barangay tanod.
Apan sa dihang nakadungog sa wangwang sa patrol car, si Pantinople nibarog ug nikaratil sa pagdagan hinungdan nga gigukod ug naabtan nila sa kapilya diin didto nagtago.
Gidala siya luwan sa patrol car sa kapulisan ngadto sa rehabilitation center.
Sa unang pagkighinabi kang Villamora, matod niya nga ang 29 anyos nga hayan high sa illegal drugs niadto kaniya uban sa konsehal nga iyang paryente kay motahan sa alas 7 sa gabii sa Martes, Pebrero 20.
Niangkon kini kaniya nga drug user ug suguon sa pagpamalit sa ubang manuyopay.
Dason sa kapitan nga iya kining gitambagan nga mohunong na sa maong bisyo samtang iyang giapungan nga nagkaon.
Sa pagkaadlawon, dako ang kakurat sa barangay kapitan dihang siya gipahibalo sa iyang barangay tanod nga si Pantinople nikatkat na sa lubi tungod sa kahadlok nga dunay mopatay kaniya.
Nagsige kini og yawyaw nga nangayo og pasaylo sa iyang “dispalko” kay iya ra kining bayran. Nagduda ang kapitan nga basin ang shabu nga iyang gigamit bayranan kadto sa nagsugo kang Pantinople.
Wa nasayod si Villamora nga dunay ilegal drugs nga nakasulod sa iyang barangay.
Ang inahan ni Pantinople wa masayod nga tiggamitan og ilegal nga drugas ang iyang anak. /