Brgy. Pasil gihatagan og lugway sa Oplan Disiplina

Wala lang una moimplementar ang kapulisan sa Dakbayan sa Sugbo uban sa Prevention Restoration Order Beautification Enhancement (Probe) sa mga ordinansa atol sa gihimong Oplan Disiplina sa Barangay Pasil niadtong Martes, Pebrero 21, 2024, sanglit gihatagan lang una nila og notice ang mga residente nga nakababag sa mga agianan sa maong barangay.

Matod ni Police Col. Ireneo Dalogdog, hepe sa Cebu City Police Office (CCPO), nga mao usab ang gitahasan ni Cebu City Mayor Michael Rama nga mangulo sa Oplan Disiplina uban sa mga departamento sa City Hall, ilang nakita nga dunay kalapasan sama sa pagbabag sa karsada nga dili na halos makaagi ang mga sakyanan, paghulagway niya.

Gihimo na usab nga parking area ang kilid sa karsada nga hugot nga gidili sa ordinansa sa Dakbayan.

Kinahanglan nga hawanan ug pamultahon ang mga tagiya niini.

Peligro kini kon dunay emergency nga mahitabo sama sa sunog ug uban pa ug dili na hinuon makaagi ang ambulansya ug mga firetruck.

“Kini siya og hugot pud kaayo ang dalan diri tungod sa kadaghang obstructions. Simbako lang naay sunog dili makasulod ang firetruck so mameligro ang mga tao,” matod ni Dalogdog.

Ang pangulo sa Probe team nga si retired Fire General Aderson Comar nagkanayon nga wala lang una sila mo-demolish sa mga istruktura ug mohatag og citation sanglit ila lang una nga gihatagan og warning ang mga residente nga nakalapas sa balaod.

Sa sunod nila nga bisita sa Barangay Pasil magdala na sila og usa ka firetruck ug ambulansya. Kon dili kini makaagi, diha na sila mohimo og aksyon aron mahawan ang agianan.

Usa mga opisyal sa Department of the Interior and Local Government Cebu City nibutyag nga kon malimpyo na ang tibuok Pasil, ila na kini nga i-turnover sa barangay officials.

Kon inig balik nila problema pa gihapon kini, mahimo’ng manubag ang mga official sama sa kapitan sanglit mag-atubang kinig kasong administratiba.