3 nasikop sa lainlain nga mga buy-bust
Tulo ka mga tawo, apil na sa usa ka drug surrenderer nga nipailawom sa drug rehabilitation program nasikop sa managlahi nga mga buy-bust sa mga anti-drug operative.
Usa ka lalaki nga gikan sa Balay Silangan Reformation Program nadakpan uban sa giingong iyang kunsabo sa buy-bust sa mga sakop sa Philippine Drug Enforcement Agency Cebu Provincial Office alas 6:45 sa Biyernes sa gabii, Pebrero 23, 2024 sa Purok Mahayahay, Brgy. Sonog, San Francisco, mga isla sa Camotes.
Ang suspek giila nga si Jufer Belmoro, 40, nalakip sa high value target sa PDEA, ug iyang kunsabo nga si Jilou Montalban, 34, silingan.
Nakuha gikan sa mga suspek ang lima ka putos sa gituohang shabu nga motimbang og 120 gramos nga dunay estimated average market value nga P816,000, tulo ka cellphones, usa ka kalibre .45 nga pistola nga dunay duha ka magazine ug pito ka mga bala niini ug multicab.
Matod ni Leia Alcantara, information officer sa PDEA 7, nga ilang nadawat ang impormasyon gikan sa usa ka kasaligang tinubdan labot sa ilegal nga kalihukan ni Belmoro.
Gilusad dayon nila ang case build up ug gisunod ang buybust uban sa San Francisco Municipal Police station, 82nd Infantry Battalion, 31D sa Philippines Army Delta Company, Provincial Intelligence Unit ug Municipal Anti-Drug Abuse Council (MADAC).
Dugang ni Alcantara nga niadtong Marso 2021 niboluntaryo og surrender si Belmoro ug nisulod sa Balay Silangan Program sa lungsod diin 18 sila ka buok nga mi avail sa plea bargain ug natapos niadtong Sepptiyembre 2021.
Nipasabot si PDEA 7 Regional Director Emerson Margate nga ang Balay Silangan Reformation Program proyekto sa gobyerno alang niadtong mga nalambigit sa ilegal nga drugas aron mahatagan og higayon nga magbag-o ug mobalik na sa pagsunod sa balaod.
Apan iyang gipasabot nga bisan kon nakatapos ka sa programa, wala kini magpasabot nga dili na siya monitoron.
TALISAY
Nagtingkagol sa bilanggoan sa Talisay City Police Station ang usa ka suspetsadong drug pusher nga nasikop sa buy-bust ug nakuhaan sa giduhang shabu nga gibana-banang motimbang og sa 25 gramos nga may standard drug price nga P170, 000 sa Sityo San Rafael, Brgy. Tanke, Siyudad sa Talisay, alas 11 sa gabii sa Pebrero 23.
Ang suspek giila nga si Tiyson Rizada Quijano, alyas Jr ., 30, ulitawo apan may kapuyo, taga Mahayahay 2 , Pasil Siyudad sa Sugbo.
Sa follow-up sa Superbalita Cebu sa kapulisan sa Talisay, nasuta nga ang suspek ilang gipanid-an human sila nakadawat og taho nga kini namaligya og shabu.