SARAHGERONIMO 1ST PINAY NGA PASIDUNGGAN SA BILLBOARD WOMEN IN MUSIC
Lakip si Popstar Royalty Sarah Geronimo sa usa sa labing una nga makadawat sa Global Force Award sa Billboard Women in Music Awards karong tuiga sa Los Angeles, California.
Si Sarah usa sa tulo ka mga awardee sa Global Force inubanan ni Brazilian singer-songwriter Luisa Sonza ug Italian artist Annalisa.
Mao kini ang labing unang tuig nga gipaila sa Billboard ang maong bag-ong award nga Global Force awards.
Kagahapon, Pebrero 24, gipahibalo sa Billboard pinaagi sa social media pages niini nga si Sarah mao ang labing una nga born-and-raised Filipina nga makadawat og award sa maong award ceremony sukad nahimugso kini niadtong 2007.
Ang awarding sa Billboard Women In Music ipahigayon karong Marso 6 sa Youtube Theater sa Los Angeles.
Lakip sa pasidunggan sila si Maren Morris alang sa Visionary, K-Pop breakout girl group NewJeans alang sa Group of the Year, Tems sa Breakthrough, Victoria Monét sa Honda Rising Star award, ug Young Miko sa American Express Impact award.
Woman of the Year Honoree usab karong tuiga ang Colombian singer nga si Karol G, kinsa nakasungkit na og nagkadaiyang GRAMMY ug Latin GRAMMY awards, Billboard Music Awards, Billboard Latin Music Awards, ug kaniadto Billboard Women in Music award alang sa Rulebreaker.
Sa iyahang Instagram story, mapasalamaton si Sarah sa maong pasidungog ug iyang gihalad ang maong pasidungog ngadto sa tanang mga “dreamer and amazing Filipino artists we have.”
“Honored and grateful to be one of the recipients of Billboard’s Global Force Award. This recognition belongs to every dreamer and amazing Filipino artist we have. Mabuhay ang OPM! Mabuhay ang Pilipinas! Maraming salamat, Billboard PH!!”
Wala pay impormasyon gikan sa singer kon motambong ba siya sa awarding sa Los Angeles. /