Maayo ang alternatibong tinubdan sa tubig
Sa away karon sa molingkod sa Board sa Metropolitan Cebu Water District (MCWD), naapil bisan ang tinubdan sa tubig. Gusto sa gitudlo ni Cebu City Mayor Michael Rama nga di idayon ang desalination plant contracts sa naglingkod nga mga sakop sa Board of Directors pinangulohan ni chairman Jose Daluz kay lagi kuno mahal.
Nitubag sab si Daluz nga mas barato kaayo ni kay sa gipang-inom karon nga bottled water sa mga Sugboanon. Tinuod sab ni ang iyang gisulti.
Sa mga appointed ni Rama, alang nila, mas maayo nga ang surface water kun tubig sa kasapaan ang gamiton pinaagi sa paghimo og mga dam. Wa may problema sab niini.
Apan mas daghan ang alternatibong mga tinubdan sa tubig, mas makaayo sa mga Sugboanon. Kay ang kasapaan nagdepende sab sa kadaghanon sa uwan.
Karon nga nagpatigbabaw sa nasod ang El Niño, ang kasapaan padulong na maughan. Kon hingpit nga moundang ang pag-uwan sumala sa weather experts, maughan ang kasapaan.
Ang usa sa mga ehemplo niini mao ang Buhisan dam nga way nay hapit matilok nga tubig kon moigo ang ting-init. Ang sapa nga tinubdan sa tubig niini, wa say kalainan sa ubang kasapaan sa Sugbo basta moigo ang taas nga ting-init.
Gipaabot nga ang global warming mograbe pa sa umaabot nga katuigan. Busa ang El Niño nga magdala og taas nga ting-init, mapaabot nga magsige og igo sa nasod. Busa, ang pagbaton og alternatibo nga tinubdan sa tubig gikan sa desalination plant usa ka maayo nga lakang nga gihimo sa kadagkuan karon sa MCWD.
Sa bag-ong teknolohiya karon, diin ang mga scientist nakagama og barato kaayo nga desalination machine, ang pagbaton og barato nga tubig pinaagi sa desalination umaabot na.
Way dautan sa paggamit sa surface water isip tinubdan kay mas barato kini. Apan sa panahon karon nga grabe ang mga kausaban dala sa global warming, ang paggamit sa desalination plants sakto kaayo nga direksyon. Usa ka lakang sa mga tawo nga dunay panglantaw sa umaabot.
Mas maayo na nga managana kay ang dagat di man mahubsan, di sama sa kasapaan nga kon maigo sa ting-init, sagad maughan ang kadaghanan sa bahin niini. Nasayod ang MCWD niini kay mao ni ang nahitabo sa mga sapa sa Mananga ug Buhisan matag panahon sa ting-init.
Di sab maayo kining tinguha sa mga sakop sa Board nga tinudlo ni Rama nga ikanselar ang mga kontrata nga gipirmahan sa board nga gipangulohan ni Daluz tungod lang sa taphaw nga katarungan.