Disiplina sa kaon
Kada buntag kong mosaka sa Brgy. Busay ug Apas aron maghatod sa akong asawa. Busa, akong matandi ang kahimtang sa trapiko 10 ka tuig ang nakalabay ug karon. Dako na kaayo og kalainan. Apan bisan pa niini, duna gihapoy mga siklista nga akong nakit-an nga ningtungas padulong ngadto sa ila ni Willy nga tapukanan sa mga manikad kada buntag.
Hangtod karon, naa gani manungas bisan gabii na. Hayan mao ni sila ang mga nagtrabaho nga manggawas og alas 4 ngadto sa alas 5 sa hapon. Mag exercise sa di pa manihapon ug matulog.
Kaning magkaedad na ta, unya dunay bantayanan nga blood pressure ug blood sugar, tambagan ka sa doktor sa pag-exercise og at least 30 minutos kada adlaw.
Yes, mao na ang tambag sa duha ka mga doktor nako base sa akoang BP ug blood sugar results.
Kon moundang ko og kape, mag 120/80 ra ang akoang BP while ang akoang blood sugar normal ra kay akoa man nga gi-control ang akong carbohydrate intake, labina sa tam-is nga mga pagkaon.
Apan unya og balik nako og pasingot, kinahanglan nga dugangan nako og gamay ang carbo intake kay nitagam ko kausa, nangurog ko og kalit ug nawad-an og umoy samtang nag brisk walking ko sa Cebu City Sports Center sa wa pa ni masirad-i alang sa repair.
DOKTOR GYUD
Sa ako nang giingon, mas maayo nga magpa check up sa di pa mo engage og bisan unsa nga exercise, labina kon mag-edad og 40 anyos pataas. Naa na dinhi mangtumaw ang nagkadaiyang mga sakit nga bantayanan kaayo.
Bisan gani ang pagkaon di maayo nga pasagaran lang kay sa madugay o madali, duna kini di maayo nga epekto sa panglawas. Sama sa diabetes ug gout nga komon kaayo nga sakit sa 40 anyos pataas.
Naa gani uban nga young adults, 20 anyos pataas, duna nay diabetes bisan wa pay 40 anyos. Kini tungod sa lifestyle. Bitaw, ang diabetes ug gout, sagad lifestyle disease, gawas sa genes.
Akong nabantayan sukad nga nagdisiplina ko sa akong kaugalingon sa sugar intake, nawala ang akong sige og huka sa ubo ug na-control ang katas-on sa akong blood sugar.
Sa ato pa, ang disiplina sa atong pagkaon dako kaayo og papel sa atoang panglawas.