‘NAGBINASTOS’, BIKTIMA MIKUMOT SA KINATAWO

Nabalhug sa Inayawan Police Station sa Cebu City Police Office (CCPO) ang usa aka 28 anyos nga lalaki nga bagger sa usa ka mall sa dakbayan sa Sugbo human siya gipadakop sa usa ka babayeng tinun-an nga iyang kasakay sa modern jeep nga biyahe gikan sa Talisay paingon sa downtown area sa dakbayan sa Sugbo.

Matod ni Police Corporal Krizia Carol Regudo, imbestigador sa Women’s Desk sa Inayawan Police Station 7 nga alas 6 sa Lunes sa buntag, Pebrero 26, 2024, nisakay sa

modern jeep si Carla ( di tinuod nga ngan), 19, taga dakbayan, tinun-an sa usa ka unibersidad sa dakbayan sa Sugbo.

Apan tungod sa kadaghan sa mga pasahero, siya nagbarog lang ug nagkasikit na sa laing pasahero nga lalaki nga naa sa iyang luyo.

Kon mo-brake ang sakyanan, idumbol sa lalaki ang iyang atubangan sa sampot sa biktima apan wala lang niya kini tagda tungod kay nakasabot siya nga kini gumikan sa momentum sa kalit nga pag-brake.

Apan nabantayan na sa biktima nga wala nibuwag ang atubangan sa suspek ug nisikit pa kini kaniya bisan sa iyang pag-irog og diyutay.

Pipila ka sigundo ang nakalabay, nabantayan sa biktima nga dunay nigahi sa atubangan sa suspek ug nagsige na og dumbol sa iyang sampot bisan wala na magluhag ang sakyanan.

GIKUMOT

Pag-abot sa Barangay Kinasang-an, dinhi na siya nisinggit dungan sa iyang pagkumot sa kinatawo sa suspek ug nimando sa driver nga ihunong ang sakyanan tungod sa pagbinastos sa mao nga lalaki kaniya.

Naatol usab nga dunay patrol car nga nakaestambay sa kilid sa karsada ug iyang gipadakop ang suspek nga si alyas Manny, taga dakbayan sa Talisay.

“Natingala na lang siya nga bisan wala na mag brake brake ang sakyanan, padayon man siya nga dumbolon sa likod ba sa iyang sampot. Iyang nabantayan nga nigahi na ang atubangan sa suspek mao to nisinggit ning babaye nya gipahunong sa duol sa patrol car sa polis diha sa Kinasang-an,” butyag ni Regudo sa mga tigbalita.

Kaso’ng acts of lasciviousness ang atubangon sa suspek nga bisan sa pagpangayo niini og pasaylo sa biktima sa iyang nahimo, gipapriso gyud siya. /