Makililimos apan duna diay SUV
Nakurat ang mga staff sa JKM, usa ka social welfare department sa Maran District, sa Pahang, Malaysia samtang nagpahigayon og operasyon sa kalsada sa Maran.
Taho sa The Straits Times nga atol sa gihimong ronda sa JKM staff sa Sri Jaya night market niadtong Pebrero 21, 2024, nakugang sila sa ilang nadiskubrehan labot sa usa ka 45 anyos nga lalaki nga usa sa makililimos sa maong lugar.
Gihulagway nga ang maong lalaki usa ka person with disability (PWD) tungod kay ang iyang mga bukton pulos mubo daw wa ma-develop, daan sa iyang pagkatawo.
Ang maong makililimos kanunay nga mopuwesto sa Maran District nga dunay paper bag nga bitbit diin niya hipuson ang iyang kita sa limos, sul-ob sa gray robe ug Muslim skull cap.
Nagtuo ang taga social welfare department nga amang ug bungol ang maong lalaki tungod kay dili kini motubag sa mga pangutana sa staff.
Wa undangi sa mga staff sa dihang nangayo sila og identification (ID) card aron sa pagsuta sa identity niini nga kabahin sa ilang gihimo’ng operasyon pinaagi sa pagkuha og data.
NAKA-SUV
Apan nitubag ang maong lalaki nga nahabilin ang iyang ID sa iyang sakyanan.
Giubanan kini sa mga staff aron sa pagkuha sa maong dokumento ug didto nipaingon sa nakaparada nga premium SUV nga Proton X70.
Nasayran nga ang maong sakyanan nagkantidad og 123,800-128,000 Malaysian ringgit (RM) o P1.4 milyunes ngadto na sa P1.5 milyunes.
Mitug-an ang maong makililimos nga moabot ngadto sa RM500 o P5,8000 matag adlaw ang iyang kitaon sa pagpakilimos.
Gawas pa, tungod kay usa siya ka PWD aduna sab siyay madawat nga binuwan nga allowance gikan sa social welfare department nga RM 450 o P5,000.
Ang maong kita sa pagpakilimos ug allowance sa gobiyerno maoy iyang gikuhaan og bayad sa iyang car installment ug sa iyang inadlaw nga panginahanglan.
I-REVIEW ANG STATUS
Gitambagan sa mga social welfare officer ang maong lalaki nga moundang una sa pagpakilimos samtang i-review ang iyang tinuoray nga status kon angay pa ba siyang makadawat og government allowance.
Ang maong departamento nipahinumdom sa publiko nga magmatngon sa paghatag sa ilang limos.
Nag-viral ang maong taho human gi-post sa Facebook page JKM Maran ang maong hitabo. /