4 PATAY, 8 ANGOL SA SUNOG SA TINAGO
Upat ka mga sakop sa usa ka pamilya nangakalas ug walo ang nangaangol sa sunog sa Sityo Sta. Lucia, Barangay Tinago, Dakbayan sa Sugbo ala 1 sa kadlawon sa Martes, Pebrero 27, 2024.
Nadawat sa kabumberohan ang alarma sa sunog sa ala 1:46 sa kaadlawon nga giisa sa first alarm.
Tungod sa kakusog sa kayo nga nilamoy sa nagsikitsikit nga kabalayan hangtod, naabot kini sa fourth alarm nianang pagka alas 2:43, mga firefighter gikan sa silingang mga siyudad ug kalungsoran ningtabang na sa pagpawong sa kayo.
Hingpit nga nakontrolar ang sunog sa alas 4:48 sa kaadlawon ug napawong ang kayo pagka alas 5:09 sa buntag.
Moabot ngadto sa 16 ka mga balay ang apektado sa sunog, 13 niini ang hingpit nga naugdaw samtang tulo ang partially damaged.
Gibana-bana nga moabot sa P7,050,000 ang danyos sa sunog.
Ang mga nakalas mao ang magtiayong Parulito Otadoy, 60 ug Rosita, 54, lakip ang ilang duha ka mga anak nga silang Joseph, 14 ug Jeffrey , 12, nga niadtong tungora nangatulog sa ikatulong andana sa ilang balay.
Samtang ang mga nangaangol nga nakaangkon og mga paso sa kalawasan ug daling gidala sa Cebu City Medical Center mao silang Sean Roby Ruelan, 21, dunay samad sa tiil; Rose Ann Otadoy, 33 , paso sa iyang lawas; Jemar Otadoy, 36, paso sa paa; Emarie Otadoy, 36; Keira Marie Otadoy; Neil John Otadoy; Christopher Otadoy ug Dylan Otadoy.
NANGA-TRAP
Matod sa kamaguwangang anak sa magtiayong Otadoy nga si Mary Jane Mendiola nga walay kabutangan ang iyang kaguol human nasayod nga nalakip ang iyang mga ginikanan ug iyang duha ka mga manghod sa pagkapaig.
Matod niya nga gipukaw siya sa iyang ugangan nga nasunog ang balay sa iyang ginikanan.
Apan tungod sa kakusog na sa kayo, wala na gyud nila matabang pa.
Ang manghod ni Mary Jane nga si Monaliza Otadoy nagkanayon nga sa dihang miulbo na ang kayo, iyang giuna sa pagluwas ang iyang tulo ka mga anak, diin ang kamanghuran masuso pa.
“Paspas kaayo ang kayo gud, nagbitbit pa kog 1 year old, pagkakita nako nga nagpadung na ang kayo, diretso na ko’g naog. Igo na lang ko nisiyagit nga naay sunog, naa man sila sa third floor sa balay,” matod ni Monaliza sa interbyo sa Superbalita Cebu.
Duha ka pamilya sila nga namuyo sa balay sa ilang ginikanan ug duna pa silay gagmay nga mga manghod nga mangeskuwela pa unta nianang pagkabuntag sa Tejero Elementary School nga nahimutang lang sa luyo sa ilang balay.
Si Fire Officer 3 Fullbert Navarro, Cebu City Fire Investigator, nagkanayon nga nagsugod ang kayo sa ikaduhang andana sa panimalay sa pamilyang Otadoy.
Dali kini nga nikatap sa mga dapat sa balay nga light materials hinungdan nga wala nakagawas ang magtiayon.
Gituohan nga ang mga bata ningsuway sa paggawas apan tungod sa kakusog na sa kayo ug sa kabaga sa aso, wala na kini makaabot sa pultahan hangtod nga nakuyapan sa nahanggap nga aso.
“Probably ang nahitabo ani niya kusog naman ang kalayo gyud gikan man kuno sa 2nd floor nagsugod, wala nani sila makadagan, pagkahugno nangahulog na sila,” matod ni Navarro.
Si Senior Fire Officer 3 Wendell Villanueva, information officer sa BFP Cebu City, niingon nga usa sa ilang nakita nga problema sa pagresponde sa sunog ang kahuot sa agianan, diin nag sumpaysumpay pa sila sa ilang mga hose aron makaabot sa interior nga bahin sa lugar.
Dugang ni Villanueva nga ang mga imbestigador sa pagkakaron nagpadayon pa sa ilang pakisusi sa hinungdan sa sunog, apan nagtuo sila nga elektrikal ang hinungdan.