Gikan sa haya sa asawa gipusil; 2 anyos naangin

Usa ka amahan kuyog sa iyang 2 anyos nga anak sakay sa motorsiklo nangaangol human sila gipamusil sa riding in tandem sa Pope John Paul II Avenue, atubangan sa Carmelite Church sa Barangay Mabolo, Dakbayan sa Sugbo alas 7:20 sa gabii sa Lunes, Pebrero 26, 2024.

Ang mga biktima giila nga sila si Smith Sayco, taga Holy Name St., Mabolo ug ang bata nga iyang gisakay sa motorsiklo.

Matod ni Police Major Romeo Caacoy Jr., hepe sa Mabolo Police Station, base sa nigawas sa imbestigasyon nga gikan sa haya sa iyang asawa nga namatay sa sulod sa Cebu City Jail tungod sa sakit ang mga biktima.

Apan nibiya si Sayco kay matod pa aduna siyay kasabot nga iyang ikakita sa naasoy nga lugar.

Dala sa biktima ang iyang anak lalaki, 2 anyos, apan pagabot sa Pope John Paul II Avenue, kalit silang gipamusil sa laing nakamotorsiklo nga nagpaabot nang daan sa dapit.

Nakaangkon og mga samad pinusilan sa nagkalainlaing bahin sa lawas ang biktima samtang ang bata naangol sa dihang natumba ang motorsiklo.

Daling gidala ang mga biktima sa usa ka tambalanan samtang ang 2 anyos nga anak niini gibalhin sa lain sab nga tambalanan.

Lima ka mga basiyo sa bala ang nakuha sa mga imbestigador sa dapit nga gipadala na nila sa PNP Forensic Unit 7 alang sa ipahigayon nga ballistic examination.

Nailhan na hinuon nila ang gunman, matod ni Caacoy, nga usa usab ka drug personality sa Mabolo nga tungod niini milusad na sila og hot pursuit operation.

Drugas ang usa sa ilang gitan-aw nga motibo sanglit ang asawa sa biktima ug siya mismo nabilanggo na tungod sa kaso sa illegal drugs.

“Base sa intel report nga among nakuha nga naa ni siyay ka contact sa cellphone nya mag-abot kuno sila sa lugar sa insidente, mao na to nahitabo na ang pagpamusil.” matod ni Police Major Caacoy.

Dugang pa nga ila karong subayon og unsay unod sa cellphone sa biktima kon aduna silay makuha nga impormasyon ilabi na sa gunman. /