Road widening sa south gipahunong ni Gob. Garcia
Gimando ni Cebu Governor Gwendolyn Garcia ang pagpahunong sa pagtrabaho sa Department of Public Works and Highways (DPWH)– Cebu 2nd district office, lakip na ang tanang mga kontraktor nga naglangkob sa road widening projects sa habagatang bahin, ilabi na sa lungsod sa San Fernando, Probinsiya sa Sugbo.
Kini maoy desisyon ni Garcia, gawas kon mohimo kini og mga lakang, nga makaabag sa pagtangtang sa mga istruktura sama sa mga poste sa kuryente, nga nakababag sa pagpalapad sa kadalanan.
Atol sa tigom nga gipangulohan sa gobernador tali sa mga kontraktor, ug DPWH Cebu second district officials, iyang gipadayag ang iyang reklamo sa nagkagrabe nga sitwasyon sa trapiko sa habagatang dalan sa lalawigan ilabi na sa San Fernando tungod sa padayon nga pagpalapad ug pagkongkreto sa kadalanan.
Nabalaka ang gobernador gumikan kay iyang naagian nga adunay mga poste sa kuryente nga wala gihapon matangtang nga makarisgo unya sa mga moagi.
Kini nasigpatan sa junction sa merkado publiko sa lungsod, ubos sa duha ka lane nga taytayan paingon na duol sa usa ka cement plant.
Hinungdan nga gimando ni Garcia ang pagpahunong sa mga proyekto sa kadalanan gawas lang kon tangtangon niini ang tanang mga nakababag sa widening.
Iya usab gipahinumdoman ang DPWH sa dugay na niyang mando sa proper nga coordination ug consultation sa Kagamhanan sa Probinsya sa Sugbo.
Subay niini, gikatakda nga mopatawag og laing tigom ang gobernador tali sa mga utility firm alang sa pagpatangtang sa wala pa maugkat nga mga poste sa dapit.