Babag sa emerhensya

Ang nanagsikit nga kabalayan nga light materials ug kahagip-ot sa dan mao kanunay ang dako’ng babag sa mga bombero sa pagtubag sa alarma sa sunog. Sama sa nahitabo sa Sitio Sta. Lucia, Brgy. Tinago, dakbayan sa Sugbo, ala 1:46 sa kaadlawon sa Martes, Pebrero 27, 2024.

Upat ka mga kinabuhi ang nakalas ug pagkaangol sa ubang mga sakop sa pamilya, kinsang balay didto nagsugod ang kayo.

Namatay ang magtiayong Parulito Otadoy, 60, ug Rosita, 54, lakip ang duha ka mga anak nga 14 ug 12 anyos.

Nikabat sa 16 ka mga balay ang apektado, 13 ang naugdaw ug tulo ang nadanyos. Kapin sa P7 milyunes ang danyos, sumala sa mga bombero.

Tungod sa kadali sa pagkatap sa kayo, giisa kini sa 4th alarm hinungdan sa pagtubag sa tanang fire assets sa mga kasikbit nga siyudad ug kalungsoran.

Apan alas 4:48 na sa buntag nakontrolar ang kayo ug hingpit nga napawong sa pagka alas 5:09 sa buntag.

Ang fire trucks sa duol nga fire stations dali nga ning-abot, apan wa makasud sa nahitaboan tungod kay way igong dan sa mga sakyanan. Gipangsumpay pa ang ilang hose.

Matod pa, ang nangamatay didto nangatulog sa ikatulong andana sa balay ug ang kayo diha nagsugod sa ikaduhang andana.

Susama usab kini sa sunog sa Barangay Tisa ug Barangay Banawa niadtong Nobiyembre 23, 2023, diin upat ka mga bata ang nangamatay nga 8, 6, 1 anyos ug 11-ka-buwan.

Gawas nga wa sila nakagawas sa ikaduhang andana sa balay tungod sa puthaw nga rehas sa bintana, wa usab nakasu’d ang mga trak sa bombero.

Namatikdan ang nagsunodsunod o halos naay sunog matag buwan sa Metro Cebu sa pagsulod sa 2024. Makaalarma. Dakong pasidaan nga magmatngon kanunay labi na sa mga dapit nga nanagsikit ang kabalayan.

Mas maayong mapangitaan og solusyon ang mga babag matag higayon nga dunay emerhensya sa barangay.