$823K nga pagpabayad palpak tungod sa picture

Usa ka babaye sa Ireland nga nikiha sa usa ka kompaniya sa insurance sa kantidad nga $823,000 napakyas human gibalibaran sa korte ang iyang pagpabayad human nakit-an sa hukmanan ang litrato sa iyang pag-apil sa usa ka kompetisyon sa paglabay og Christmas tree.

Si Kamila Grabska, 36, nikiha sa RSA Insurance tungod sa iyang giingon nga sakit sa likod ug liog gikan sa pagkabangga sa awto kaniadtong 2017, taho sa Irish Independent.

Ang aksidente naghimo kaniya nga dili makatrabaho sulod sa sobra sa lima ka tuig, siya niingon.

Giingon usab ni Grabska nga dili niya makugos ang iyang mga anak, pagbuhat sa mga buluhaton sa balay, o makaalsa sa bug-at nga bag ug nga, usahay, kinahanglan niya ang iyang tambal nga dad-on sa iyang higdaanan tungod sa kasakit, dugang taho sa news outlet.

Apan ang usa ka litrato nga gipakita sa Irish High Court sa Limerick nagpakita kang Grabska nga nilabay og Christmas tree kaniadtong Enero 2018, matod sa taho.

Si Grabska, usa ka residente sa lungsod sa Ennis, usa sa mga tawo nga nakuhaan og litrato nga niitsa sa 5 ka tiil nga pinutol nga kahoy sa lokal nga kompetisyon sa paglabay sa Christmas tree, segun sa makita sa artikulo sa BBC. Ang mga contestant nagtigi kon kinsay makalabay og labing layo sa kahoy.

Ang Irish Independent nitaho nga si Grabska niangkon kang Judge Carmel Stewart nga siya ang nidaug sa kompetisyon.

Usa ka artikulo sa 2018 gikan sa outlet nagngalan kaniya nga mananaug sa kompetisyon sa mga babaye.

Makita si Grabska nga naguna sa hulagway sa artikulo sa usa ka babaye nga nag-jacket ug nagwantes nga pangtrabaho ug ingon og nagsalibay sa usa ka kahoy.

Pipila lang ka adlaw sa wala pa ang kompetisyon, gipahibalo ni Grabska ang mga doktor sa kanunay nga kasakit sa iyang buko-buko, likod, ug liog, dugang sa Irish Independent.

“It is a very large, natural Christmas tree, and it is being thrown by her in a very agile movement,” kutlo sa news outlet kang Stewart, ang presiding judge, nga niingon. “I’m afraid I cannot but conclude the claims were entirely exaggerated.”

Gipakita usab sa korte ang footage ni Grabska nga nagdula sa usa ka Dalmatian sa usa ka parke sulod sa mga 90 minuto, dugang sa Irish Independent report.

Ang footage gikuha kaniadtong Nobiyembre 2023, taho sa The Telegraph.